নগাঁও, 20 জুন : নগাঁৱত আন্তঃৰাজ্যিক প্ৰৱঞ্চকৰ জাল ৷ ট্ৰেক্টৰত চকু আন্তঃৰাজ্যিক প্ৰৱঞ্চক চক্ৰৰ। নগাঁৱৰ হয়বৰগাঁও আৰক্ষীৰ অনুসন্ধানত পোহৰলৈ আহিছে জালিয়াতিৰ ভয়ংকৰ তথ্য। স্থানীয় লোকৰ সহযোগত ভুৱা প্ৰমাণ পত্ৰৰে ফাইনেন্সৰ পৰা ট্রেক্টৰ ক্ৰয় কৰি আন্তঃৰাজ্যিক চক্ৰৰ হাতত বিক্ৰী কৰাৰ ঘটনা সংঘটিত হৈছে নগাঁৱত।
নগাঁৱৰ মহেন্দ্ৰ ট্রেক্টৰ ডিলাৰৰ পৰা শনিবাৰে ৰূপহীহাটৰ এজন লোকে তথ্য জালিয়াতিৰে মাত্ৰ ডেৰ লাখ টকা জমা দি ক্ৰয় কৰিছিল এখন ট্রেক্টৰ। কিন্তু ট্রেক্টৰ ক্ৰয় কৰি আন্তঃৰাজ্যিক চক্ৰৰ হাতত বিক্ৰী কৰাৰ পাচতেই নগাঁৱৰ খুটিকটিয়াস্থিত মহিন্দ্ৰ অ'ট'মোবাইল নামৰ প্ৰতিষ্ঠানটোৰ স্বত্বাধিকাৰী অজয় মিট্টালে হয়বৰগাঁও আৰক্ষী চকীত দাখিল কৰে এজাহাৰ ৷ এই এজাহাৰৰ ভিত্তিত অনুসন্ধান আৰম্ভ কৰে হয়বৰগাঁও আৰক্ষীয়ে। হয়বৰগাঁও আৰক্ষী চকীৰ ভাৰপ্ৰাপ্ত বিষয়া আবেদুৰ ৰহমানৰ নেতৃত্বত আৰক্ষীৰ এটা দলে চলোৱা অভিযানত পোহৰলৈ আহিছে ভয়ংকৰ জালিয়াতিৰ তথ্য।