নগাঁও, 22 জুন: 49 দিন অতিক্ৰম কৰিলে মণিপুৰৰ হিংসাত্মক ঘটনাই ৷ কিন্তু এতিয়াও নিৰ্বাপন হোৱা নাই হিংসাৰ জুই ৷ প্ৰকৃতিৰ ৰম্যভূমি স্বৰূপ মণিপুৰ বিলীন হৈছে ছাঁই আৰু ধোঁৱাৰ মাজত ৷ অতি কমেও 50 হাজাৰ লোক গৃহহীন হোৱাৰ উপৰিও শতাধিক লোক নিহত আৰু তিনি শতাধিক লোক আহত হৈছে গোষ্ঠীগত সংঘৰ্ষত ৷ মেইটেই জনগোষ্ঠীক জনজাতিৰ মৰ্যাদা প্ৰদানক লৈয়েই জ্বলিছে মণিপুৰ ৷ প্ৰায় 40 সহস্ৰাধিক সেনাই অহৰ্নিশে প্ৰচেষ্টা অব্যাহত ৰাখিছে পৰিস্থিতি নিয়ন্ত্ৰণৰ বাবে ৷ কিন্তু দুৰ্বৃত্তই তাৰ মাজতেই চলাই গৈছে হিংসাত্মক কাৰ্য ৷
মণিপুৰত অব্যাহত থকা হিংসাত্মক পৰিস্থিতি সন্দৰ্ভত এই পৰ্যন্ত কোনো ধৰণৰ মন্তব্য কৰা নাই প্ৰধানমন্ত্ৰীয়ে ৷ যাক লৈ ক্ষোভিত হৈ পৰিছে মণিপুৰবাসী ৷ আনকি যোৱা দেওবাৰে সম্প্ৰচাৰিত প্ৰধানমন্ত্ৰী মোদীৰ মন কী বাত অনুষ্ঠানতো উচ্চাৰিত নহ’ল মণিপুৰৰ প্ৰসংগ ৷ যাৰ ফলত ক্ষোভিত একাংশ লোকে ইম্ফলত ৰেডিঅ’ ভাঙি নৰেন্দ্ৰ মোদীৰ বিৰুদ্ধে প্ৰতিবাদ সাব্যস্ত কৰে ৷ তাৰোপৰি মণিপুৰৰ কেইবাজনো বিৰোধী বিধায়কে কেইবাদিনো ধৰি দিল্লীত বাহৰ পাতিও লগ ধৰিব নোৱাৰিলে প্ৰধানমন্ত্ৰীক ৷ তেওঁলোকক সম্পূৰ্ণ ৰূপে উপেক্ষা কৰি আমেৰিকালৈ উৰা মাৰে নৰেন্দ্ৰ মোদী ৷
কেন্দ্ৰীয় গৃহমন্ত্ৰী অমিত শ্বাহে চাৰিদিন মণিপুৰত বাহৰ পাতি পৰিস্থিতিৰ বুজ লয় যদিও বিশেষ ফল নধৰিলে ৷ তাৰ পাচতেই আৰম্ভ হয় জনপ্ৰতিধিৰ গৃহত অগ্নিসংযোগৰ ঘটনা ৷