নাওবৈচা, 19 আগষ্ট:বানাক্ৰান্তই বান সাহায্য নাপাই, পাইছে বানত কোনো ক্ষতিগ্ৰস্ত নোহোৱা লোকেহে ৷ এই অভিযোগ উত্থাপন কৰিছে নাওবৈচাৰ একাংশ বঞ্চিত বানাক্ৰান্তই ৷ কিছুদিন পূৰ্বে আকস্মিকভাৱে অহা শিঙৰা নদীৰ বানে আতংকৰ সৃষ্টি কৰিছিল সমগ্ৰ নাওবৈচা অঞ্চলত ৷ শিঙৰাৰ আকস্মিক বানত বহু লোক গৃহহাৰা হোৱাৰ লগতে, প্ৰাণ হেৰুৱাইছিল 4 গৰাকীকৈ লোকে ৷ নিমিষতে সৰ্বস্বান্ত হৈ পৰিছিল বহু লোক ৷ কিন্তু সেই বানাক্ৰান্ত লোকৰ অৱস্থা বুজাত যেন অপাৰগ বিভাগীয় কৰ্তৃপক্ষ ৷
স্থানীয় বিধায়ক মামুন ইমদাদুল হক চৌধুৰীয়ে এই পৰ্যন্ত বানপীড়িত লোকক সাহায্য প্ৰদান কৰাটো দূৰৰে কথা, দীৰ্ঘদিন ধৰি তেওঁৰ চেহেৰাও দেখা নাই বুলি জানিবলৈ দিয়ে ভুক্তভোগী ৰাইজে ৷ জিলাখনৰ দুই এক স্বেচ্ছাসেৱী সংগঠনে বন্যাৰ্তৰ মাজত সাহায্য সামগ্ৰী বিতৰণ কৰিছে যদিও সেইয়াও নগণ্য ৷ এমুঠি অন্নৰ বাবে হাহাকাৰ কৰি থকা লোকসকলৰ মাজত জিলা প্ৰশাসনৰ পৰা বিতৰণ কৰা বান সাহায্যতো দুৰ্নীতিৰ অভিযোগ কৰিছে ভুক্তভোগী লোকে ৷ বনপীড়িত ৰাইজৰ অভিযোগ অনুসৰি, স্থানীয় গাঁওবুঢ়া হীৰেন গগৈয়ে বানত ক্ষতিগ্ৰস্ত হোৱা লোকৰ বিপৰীতে, ক্ষতিগ্ৰস্ত নোহোৱা পৰিয়ালকহে বান সাহায্য প্ৰদান কৰিছে ৷ তালিকাতো অন্তৰ্ভুক্ত হৈছে একাংশ ক্ষতিগ্ৰস্ত নোহোৱা পৰিয়ালৰহে নাম ৷ যাৰ বাবে সাহায্যৰ আশাৰে বাট চাই ৰোৱা হিতাধিকাৰীসকল সম্প্ৰতি ক্ষোভিত হৈ পৰিছে প্ৰশাসনৰ লোকৰ বিৰুদ্ধে ৷ প্ৰশাসনক পৰ্যাপ্ত খাদ্য সামগ্ৰী প্ৰদানৰ দাবী বঞ্চিত বানাক্ৰান্তৰ ৷
লগতে পঢ়ক:বৰপেটাৰ জনস্বাস্থ্য কাৰিকৰী বিভাগত ব্যাপক কেলেংকাৰীৰ অভিযোগ