কৰিমগঞ্জ, 13 জুন : ড্ৰাগছৰ বিৰুদ্ধে চলি থকা অভিযানত কৰিমগঞ্জ আৰক্ষীৰ ব্যাপক সাফল্য । আন্তৰ্জাতিক স্তৰত বাংলাদেশী চক্ৰৰ(bangladeshi drugs racket) সৈতে অসমৰ ড্ৰাগছ ব্যৱসায়ীয়ে চলাই থকা ৰমৰমীয়া বেহাৰ ঘাটি ফাদিল কৰিছে কৰিমগঞ্জ আৰক্ষীয়ে । এই চক্ৰটোৰ বিৰুদ্ধে গোপন সূত্ৰৰ পম খেদি কৰিমগঞ্জৰ সদৰ আৰক্ষী আৰু সীমান্তৰক্ষী বাহিনীয়ে যৌথ অভিযান চলাই সাফল্য লাভ কৰে। ভাৰত-বাংলাদেশৰ আন্তৰ্জাতিক সীমান্ত(Indo-Bangladesh international border)ৰ কাটা তাঁৰৰ বাহিৰৰ জিৰ’ লাইনত বাস কৰা এগৰাকী লোকৰ ঘৰৰ পৰা আৰক্ষীয়ে জব্দ কৰে বৃহৎ পৰিমাণৰ ড্ৰাগছৰ টেবলেট আৰু বাংলাদেশী ধন(bangladeshi currency) ।
আন্তৰ্জাতিক বজাৰত আশী লাখ টকাৰ অধিক মূল্যৰ প্ৰায় আঠ হেজাৰ নিষিদ্ধ ড্ৰাগছৰ টেবলেট আৰু নগদ তেৰ হেজাৰ বাংলাদেশী ধনসহ আৰক্ষীয়ে আটক কৰিবলৈ সক্ষম এজন ড্ৰাগছ ব্যবসায়ীক । জানিব পৰা মতে, কৰিমগঞ্জ আৰক্ষীৰ হাতত আটক হোৱা ড্ৰাগছ ব্যবসায়ীজনৰ নাম হৈছে শাকিৰ আলী । ধৃত শাকিৰৰ ঘৰ কৰিমগঞ্জ আৰক্ষী থানাৰ অন্তৰ্গত ভাৰত-বাংলাদেশ সীমান্তৰ নৰ্থ লাফাশাইল গাঁৱত । আন্তৰ্জাতিক সীমান্ত নিৰ্ধাৰণ কৰা কাঁইটীয়া তাঁৰৰ বাহিৰত ঘৰ হোৱাৰ সুবিধা গ্ৰহণ কৰি শাকিৰে অতি সহজে বাংলাদেশৰ সৈতে চলাই ৰাখিছিল ড্ৰাগছ ব্যৱসায় ।