কৰিমগঞ্জ, 15 জুলাই: কৰিমগঞ্জত বিধ্বংসী অগ্নিকাণ্ড ৷ জুইত জাহ গ’ল কেইবাটাও বাসগৃহ ৷ শুকুৰবাৰৰ পুৱাৰ ভাগত বদৰপুৰ বাদেমহল গাৱঁৰ আব্দুল বাতিনৰ ঘৰত সংঘটিত হয় এই দুৰ্ঘটনা ৷ গেছভৰ্তি চিলিণ্ডাৰৰ বিস্ফোৰণ ঘটাৰ পাছতে হঠাতে জুইয়ে আঁৱৰি ধৰে ঘৰটোৰ কেইবাটাও কোঠা (Cylinder blast in Karimganj) ৷
এই ভয়াৱহ অগ্নিকাণ্ডত প্ৰায় দুই লক্ষাধিক টকাৰ ক্ষয়-ক্ষতি হোৱা বুলি জানিব দিয়ে অগ্নিনিৰ্বাপক বাহিনীৰ কৰ্মী নুৰুল ইছলামে ৷ মন কৰিবলগীয়া বিষয় যে, অতিকৈ পিছপৰা অঞ্চল হোৱা হেতুকে বাদেমহাকাল গাঁৱৰ লোকসকলে বিভিন্ন সময়ত পৰি আহিছে বিপদত ৷ ইফালে অগ্নিনিৰ্বাপক বাহিনীৰ কোনো যোগাযোগ নম্বৰ কাৰোৰে হাতত নথকাৰ হেতুকে সময়ত অগ্নি আৰু জৰুৰীকালীন সেৱাক খৱৰ দিব পৰা নাছিল ৷ পলমকৈ খবৰ পোৱাৰ পাছত অগ্নিনিৰ্বাপক বাহিনীৰ গাড়ী ঘটনাস্থলীত উপস্থিত হোৱাৰ পাছতহে নিয়ন্ত্ৰণলৈ আহে জুই ৷