দক্ষিণ কামৰূপ, 30 জুন : লক্ ডাউনৰ মাজত মহানগৰীৰ ৰাণীগেটত ভিৰ একাংশ লোকৰ ৷ এডাল বিশেষ গছলৈ দৃষ্টি নিৱদ্ধ সকলোৰে । সকলোৱে কেৱল চাইছে গছ ডালৰ ওপৰলৈ ৷ কি সাধাৰণ জনতা, কি আৰক্ষী সকলোৱে গাড়ী ৰখাই হলেও চাইছে গছটোলৈ । আনকি কোনোবাই কোনোবাই ফটোও তুলিছে গছডাললৈ বুলি । আনহাতে গছজোপাৰ ওপৰৰে উৰি ফুৰিছে কাউৰী আদি বিভিন্ন চৰাই । সকলোৰে কেৱল চকু গছডালৰ শিখৰলৈ ।
কাৰণ পুৱাৰে পৰা মহানগৰীৰ ৰাণীগেটত এডাল গছৰ শিখৰত উঠি আছে এডাল প্ৰকাণ্ড অজগৰ সাপ । পুৱাৰ ভাগতে বৰষুণ দি থকাৰ সময়ত বনাঞ্চলৰ পৰা ওলাই আহি গছডালৰ এটি ডালত উঠি আছিল প্ৰকাণ্ড অজগৰ সাপডাল ৷ সেয়ে অজগৰ সাপডালক চাবলৈ বুলি ৰাইজৰ ভিৰ ৷ প্ৰকাণ্ড সাপডাল উদ্ধাৰৰ বাবে ওলাই আহিল কেইবাজনো লোক ৷ প্ৰথমে বাহেৰে নমাবলৈ চেষ্টা কৰিও ব্যৰ্থ হয় ৷ এজন যুৱকে গছজোপাত উঠি যায় যদিও সাপডাল উদ্ধাৰ কৰাত বিফল হোৱাত আন এজন লোক উঠি গৈ গছৰ ডাল কাটি পিচত উদ্ধাৰ কৰে প্ৰকাণ্ড অজগৰ সাপডাল ।