গুৱাহাটী, 8 জানুৱাৰী : অসম প্ৰদেশ কংগ্ৰেছৰ সেৱা দলৰ ৰাজ্যিক অভিৱৰ্তন সোমবাৰে গুৱাহাটীৰ মাছখোৱাত অনুষ্ঠিত হয় ৷ অভিৱৰ্তনত সভাপতিত্ব কৰে অসম প্ৰদেশ কংগ্ৰেছৰ সেৱা দলৰ সভাপতি দ্বীপ বায়নে ৷ অনুষ্ঠানত কংগ্ৰেছ সেৱা দলৰ ৰাষ্ট্ৰীয় অধ্যক্ষ লালজী দেশাই আৰু কংগ্ৰেছৰ ৰাষ্ট্ৰীয় মুখপাত্ৰ মহিমা সিং, অসম প্ৰদেশ কংগ্ৰেছৰ সভাপতি ভূপেন বৰা, সাংসদ গৌৰৱ গগৈ, আব্দুল খালেক, বিধায়ক ৰেকিবুদ্দিন আহমেদ, কংগ্ৰেছ নেত্ৰী মীৰা বৰঠাকুৰ আদি উপস্থিত থাকে ৷
অনুষ্ঠানত ভাষণ দি ভূপেন বৰাই কয় যে কংগ্ৰেছ দলৰ অবিচ্ছেদ্য অংগ হ'ল সেৱা দল ৷ তেওঁ কয় যে অহা 18 জানুৱাৰীত ৰাহুল গান্ধী অসমলৈ ন্যায় যাত্ৰাৰ বাবে আহিব ৷ ৰাহুল গান্ধীয়ে 8 টা দিন অসমত কটাব ৷ ৰাজ্যৰ 17 খন জিলাত এই যাত্ৰা হ'ব বুলি জানিবলৈ দিয়ে ভূপেন বৰাই ৷
প্ৰদেশ কংগ্ৰেছৰ সভাপতি ভূপেন বৰাই অসমৰ বিভিন্ন ঠাইত সেৱা দলৰ কমিটী গঠন কৰাৰ বাবে আহ্বান জনায় ৷ লগতে বুথ কমিটি গঠনতো গুৰুত্ব দিয়ে তেওঁ ৷ এই অনুষ্ঠানত ভাষণ প্ৰদান কৰি আব্দুল খালেকে কয় যে, আৰ এছ এছ আৰু সেৱা দলৰ মাজত পাৰ্থক্য আছে ৷ আৰ এছে এছে বিভেদ আৰু ঘৃণা জন্মায় ৷ আৰ এছে এছে বিজেপি দলক নিয়ন্ত্ৰণ কৰে ৷ কিন্তু সেৱা দল সম্প্ৰীতিৰ বাৰ্তাবাহক বুলি কয় আব্দুল খালেকে ৷