আন্তঃৰাষ্ট্ৰীয় বজাৰত মূল্য হ্ৰাসৰ পিচতো ভাৰতত পেট্ৰ'ল-ডিজেলৰ ব্যাপক মূল্যবৃদ্ধি

পেট্ৰ'ল-ডিজেলৰ মূল্য বৃদ্ধিয়ে মাধমাৰ সোধাইছে সাধাৰণ জনতাক। মূল্য বৃদ্ধিৰ সমান্তৰালকৈ কিন্তু হ্ৰাস পাইছে পেট্ৰ'ল-ডিজেলৰ বিক্ৰী। আন্তৰ্জাতিক বজাৰত খাৰুৱা তেলৰ মূল্য হ্ৰাস পোৱাৰ পাচতো দেশত প্ৰতিদিনে পেট্ৰ'ল-ডিজেলৰ মূল্য বৃদ্ধি পোৱাত অতিষ্ঠ হৈ পৰিছে সাধাৰণ জনতা ।

গুৱাহাটী, 24 জুন : দেশত প্ৰতিদিনে বৃদ্ধি পাইছে পেট্ৰ'ল-ডিজেলৰ মূল্য। পেট্ৰ'ল-ডিজেলৰ এই মূল্য বৃদ্ধিয়ে মাধমাৰ সোধাইছে সাধাৰণ জনতাক। মূল্য বৃদ্ধিৰ সমান্তৰালকৈ কিন্তু হ্ৰাস পাইছে পেট্ৰ'ল-ডিজেলৰ বিক্ৰী। লক ডাউনৰ পিছৰে পৰা পেট্ৰ'ল-ডিজেলৰ বিক্ৰীত ব্যাপক প্ৰভাৱ পৰিছে ৷ কৰ'ণা ভাইৰাছৰ সংক্ৰমণৰ পৰা ৰক্ষা পাবলৈ কেন্দ্ৰ চৰকাৰে চলিত বছৰৰ মাৰ্চ মাহৰ ২৪ তাৰিখৰ পৰা দেশজুৰি ঘোষণা কৰিছিল লক ডাউন ।

প্ৰায় তিনি মাহ ধৰি দেশত চাৰিটা পৰ্যায়ৰ লক ডাউনৰ পিছত দেশৰ অৰ্থনৈতিক অৱস্থা দুৰ্বল হৈ পৰিছে । লক ডাউনৰ ফলত দোকান, বজাৰ, স্কুল, কলেজ, ব্যৱসায়িক প্ৰতিষ্ঠানৰ লগতে বন্ধ হৈ পৰিছিল গাড়ী-মটৰৰ চলাচল । লক ডাউনৰ পৰা দেশৰ পেট্ৰ'ল পাম্প সমূহক ৰেহাই দিয়া হৈছিল যদিও পথত গাড়ী-মটৰৰ চলাচল অবিহনে পেট্ৰ'লৰ আৰু ডিজেলৰ বিক্ৰীও হ্ৰাস পাইছে ।

বৰ্তমান লক ডাউন শিথিল হৈছে, সকলো ব্যৱস্থা কিছু স্বাভাৱিক দিশলৈ ঘুৰি আহিছে যদিও পেট্ৰ'ল-ডিজেলৰ বিক্ৰী এতিয়াও পূৰ্বৰ দৰে হৈ উঠা নাই । মহানগৰী গুৱাহাটীৰ গণেশগুৰিৰ এইখন পেট্ৰ'ল পাম্পত লক ডাউনৰ পূৰ্বে প্ৰতিদিনে ৮ পৰা ১০ হাজাৰ লিটাৰ পেট্ৰ'ল আৰু ডিজেল বিক্ৰী হৈছিল কিন্তু লক ডাউনৰ আৰম্ভণিৰ এইখন পেট্ৰ'ল পাম্পত কমি গৈছে বিক্ৰী । বৰ্তমান গুৱাহাটীত পেট্ৰ'লৰ প্ৰতিলিটাৰত মূল্য 83.98 টকা আৰু ডিজেলৰ প্ৰতিলিটাৰত মূল্য 78.56 টকা ৷

বৰ্তমান প্ৰতিদিনে এই পেট্ৰ'ল পাম্পত ৪ হাজাৰ লিটাৰ পেট্ৰ'ল আৰু ৫ হাজাৰ লিটাৰ ডিজেল বিক্ৰী হয় । বিক্ৰী হ্ৰাস পোৱাৰ লগে লগে পেট্ৰ'ল পাম্পটোত হ্ৰাস পাইছে লাভৰ পৰিমাণ । শতাধিক কর্মী থকা পেট্ৰ 'ল পাম্পটোত এতিয়া কৰ্মচাৰী সকলৰ দৰমহা দিয়াৰ ক্ষেত্ৰতো সমস্যাৰ সৃষ্টি হৈছে । অনুৰূপ সমস্যা এতিয়া মহানগৰীৰ প্ৰতিটো পেট্ৰ'ল পাম্পৰ ক্ষেত্ৰতে পৰিলক্ষিত হৈছে ।

আন্তৰ্জাতিক বজাৰত খাৰুৱা তেলৰ মূল্য হ্ৰাস পোৱাৰ পাচতো দেশত প্ৰতিদিনে পেট্ৰ'ল-ডিজেলৰ মূল্য বৃদ্ধি পোৱাত অতিষ্ঠ হৈ পৰিছে সাধাৰণ জনতা । পেট্ৰ'ল-ডিজেলৰ মূল্যবৃদ্ধিক লৈ বুধবাৰে অসম প্ৰদেশ কংগ্ৰেছ কমিটিয়ে ৰাজীৱ ভৱনত এক প্ৰতিবাদী কাৰ্যসূচীও ৰূপায়ন কৰে । প্ৰতিবাদস্থলীৰ পৰা ৰাজ্যৰ প্ৰাক্তন মুখ্যমন্ত্ৰী তৰুণ গগৈ আৰু অসম প্ৰদেশ কংগ্ৰেছ কমিটিৰ সভাপতি ৰিপুন বৰাই মোদী চৰকাৰক তীব্ৰ সমালোচনা কৰে । আনহাতে সাধাৰণ ৰাইজেও এই ব্যাপক মূল্যবৃদ্ধি পৰিপ্ৰেক্ষিতত আশাহত হৈ পৰিছে নৰেন্দ্ৰ মোদী নেতৃত্বাধীন এন ডি এ চৰকাৰৰ ওপৰত ৷

লগতে পঢ়ক :মণিপুৰৰ ৰাজনৈতিক অচলাৱস্থাঃ উদ্ধাৰকাৰীৰ ৰূপত হিমন্ত-কনৰাড