গুৱাহাটী, 8 নৱেম্বৰ : ‘‘অসম চৰকাৰে ৰাজ্যৰ লাখ লাখ নিবনুৱাৰ ভৱিষ্যতকলৈ হেতালি খেলিছে ৷ নিযুক্তিৰ নামত কেলেংকাৰী সংঘটিত কৰি শিক্ষিত যুৱক-যুৱতীসকলৰ ভৱিষ্যত অন্ধকাৰৰ ফালে ঠেলি দিছে ৷ যুৱক-যুৱতী সকলকলৈ চৰকাৰে কৰা এনে অন্যায় অসমৰ জনগণে কেতিয়াও মানি নলয় ’’ ৷ এই হুংকাৰ জাতীয় যুৱ শক্তিৰ ৷ দীঘলীপুখুৰীৰ পাৰত ৰূপায়ন কৰা প্ৰতিবাদী কাৰ্যসূচীত অংশগ্ৰহণ কৰি এই মন্তব্য প্ৰদান কৰিলে সংগঠনটোৰ প্ৰতিনিধিসকলে ৷
উল্লেখ্য যে, ৰাজ্যৰ বৰ্ধিত নিবনুৱা সমস্যাকলৈ ‘অসম জাতীয় পৰিষদ’ৰ ভাতৃ সংগঠন 'জাতীয় যুৱ শক্তি'য়ে দেওবাৰে দীঘলীপুখুৰীৰ পাৰত ৰূপায়ণ কৰা প্ৰতিবাদী কাৰ্যসূচীত বিভিন্ন চৰকাৰ বিৰোধী শ্ল’গানেৰে উত্তাল কৰি তোলে পৰিৱশে ৷ আনহাতে, শেহতীয়াকৈ অসম আৰক্ষীৰ উপ-পৰিদৰ্শক পদৰ নিযুক্তি কেলেংকাৰীৰ লগতে APDCL, PNRD আৰু বিদেশী ন্যায়ধীকৰণৰ নিযুক্তিত সংঘটিত হোৱা ব্যাপক খেলিমেলিৰ বাবে দেওবাৰে সৰব হোৱা দেখা গ’ল জাতীয় যুৱ শক্তিক ৷ দেওবাৰৰ বিক্ষোভ কাৰ্যসূচীত অংশগ্ৰহণ কৰে 'জাতীয় যুৱ শক্তি'ৰ তত্ৱাবধায়ক চিত্তৰঞ্জন বসুমতাৰীৰ লগতে যুৱ শক্তিৰ প্ৰায় শতাধিক কৰ্মী ৷
লগতে পঢ়ক :বিশ্বনাথত নিৰ্বাচনী ৰণকৌশল প্ৰস্তুত বিধায়ক ৰঞ্জিত দত্তৰ