গুৱাহাটী, ১৩ ফেব্ৰুৱাৰী : শনিবাৰে মুখ্যমন্ত্ৰী ড৹ হিমন্ত বিশ্ব শৰ্মাই শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত শংকৰদেৱ আন্তর্জাতিক প্ৰেক্ষাগৃহত অতিৰিক্ত উপায়ুক্ত (ৰাজহ), ৰাজহ চক্ৰ বিষয়া আৰু সংলগ্ন চক্ৰ বিষয়াসকলৰ সৈতে মিছন বসুন্ধৰাৰ সামগ্ৰিক অগ্ৰগতি সন্দৰ্ভত পর্যালোচনা কৰে (Review meeting on Mission Basundhara)। উল্লেখ্য যে, ২০২১ চনৰ ২ অক্টোবৰত আৰম্ভ কৰা এই মিছন বসুন্ধৰাৰ অধীনত ৮ লাখ ১০ হাজাৰতকৈও অধিক আবেদন লাভ কৰা হৈছে ৷
বৰ্তমানলৈ ইয়াৰে ৩ লাখ ২০ হাজাৰৰো অধিক সেৱা নিষ্পত্তি কৰা হৈছে । ১০ মে’ৰ ভিতৰত সকলোবোৰ আবেদনৰ নিষ্পত্তিকৰণৰ সময়সীমা নিৰ্দ্ধাৰণ কৰা হৈছে । অনুষ্ঠানত মুখ্যমন্ত্ৰীয়ে মিছন সম্পর্কীয় যিকোনো অভাৱ-অভিযোগ অৱগত কৰাৰ বাবে মিছন বসুন্ধৰাৰ ইন্টিগ্ৰিটি হেল্পলাইনো আনুষ্ঠানিকভাৱে মুকলি কৰে (Assam CM releases helpline number for Applications under mission basundhara) ।
পর্যালোচনা সভাত বক্তব্য প্ৰদান কৰি মুখ্যমন্ত্ৰীয়ে এই অভিযানৰ লগত জড়িত থকা সকলো অতিৰিক্ত উপায়ুক্ত (ৰাজহ), ৰাজহ চক্ৰ বিষয়া আৰু সংলগ্ন চক্ৰ বিষয়াসকলক ঐকান্তিকতাৰে নিজৰ দায়িত্ব পালন কৰাৰ বাবে আহ্বান জনায় । মুখ্যমন্ত্ৰীয়ে অতিৰিক্ত উপায়ুক্ত (ৰাজহ)ক নাকচ কৰা আবেদনসমূহ ভালধৰণে পুনৰীক্ষণ কৰাৰ পদক্ষেপ ল’বলৈ নিৰ্দেশ দিয়ে, যাতে কোনো আবেদন গ্ৰহণযোগ্য কাৰণ নোহোৱাকৈ নাকচ নহয় ।
লগতে পঢ়ক :Power Minister Bimal Bora at Gogamukh: পৰিদৰ্শন কৰিলে অঞ্চলটোৰ বিদ্যুৎ সংযোগৰ ব্যৱস্থা
মুখ্যমন্ত্ৰীয়ে লগতে মানসম্পন্ন নিষ্পত্তিকৰণৰ ওপৰত গুৰুত্ব আৰোপ কৰিবলৈ বিষয়াসকলক আহ্বান জনায় । মুখ্যমন্ত্ৰীয়ে আবেদনসমূহ নিষ্পত্তিকৰণৰ দিশত বিলম্বতাবিহীন, নিখুত আৰু ক্ৰমসূচী ভালদৰে মানি চলাৰ ওপৰত গুৰুত্ব আৰোপ কৰিবলৈ বিষয়াসকলক নিৰ্দেশ দিয়ে । সকলো ৰাজহ চক্ৰ বিষয়াৰ কাৰ্যালয়ত যাতে সঠিক নীতি-নিয়ম মানি চলা হয়, তাৰ ওপৰত গুৰুত্ব আৰোপ কৰিবলৈও তেওঁ আহ্বান জনায় ।