গুৱাহাটী, ২১ জানুৱাৰী:ৰঙালী বিহুৰ পূৰ্বেই ৰাজ্যৰ বিধানসভা নিৰ্বাচন অনুষ্ঠিত হোৱাটো একপ্ৰকাৰ নিশ্চিত হৈছে । গতিকে স্বাভাৱিকতে এই সময়ত বিজেপি আৰু মিত্ৰদলসমূহ আসনৰ ভাগ-বটোৱাৰাৰ দিশে অগ্ৰসৰ হৈছে । বিশেষকৈ অসম গণ পৰিষদ আৰু ভাৰতীয় জনতা পাৰ্টীৰ মাজত এইবাৰ আসন বুজাবুজিৰ ক্ষেত্ৰত ভালেখিনি পৰিৱৰ্তন পৰিলক্ষিত হ'ব বুলি ধাৰণা কৰিব পাৰি । কিয়নো বৰ্তমান অগপৰ দখলত কেইবাটাও সমষ্টি আঞ্চলিক দলটোৱে বিজেপিক এৰি দিয়াটো নিশ্চিত । একেদৰে, বিজেপিয়েও নিজৰ দখলত থকা দুই এটা সমষ্টি এৰি দিব মিত্ৰদল অগপক ।
অগপৰ এক শীৰ্ষ সূত্ৰই প্ৰকাশ কৰা মতে,প্ৰধানমন্ত্ৰী নৰেন্দ্ৰ মোদী আৰু গৃহ মন্ত্ৰী অমিত শ্বাহৰ আগন্তুক অসম ভ্ৰমণৰ পিছতেই দুই দলৰ মাজত আসনৰ ভাগ-বটোৱাৰাৰ বিষয়টো চূড়ান্ত কৰা হ'ব । অৰ্থাৎ ফেব্ৰুৱাৰীৰ ভিতৰতে দুই দলৰ আসনৰ ভাগ-বটোৱাৰা সম্পূৰ্ণ হৈ উঠিব । সূত্ৰটোৱে প্ৰকাশ কৰা মতে বৰ্তমানে অগপৰ দখলত থকা পাটাছাৰকুছি, নাহৰকটীয়া আৰু উত্তৰ অসমৰ এটা সমষ্টি এইবাৰ দলটোৱে বিজেপিক এৰি দিব । ইয়াৰ বিপৰীতে পলাশবাৰী সমষ্টিটো বৰ্তমান বিজেপিৰ দখলত আছে যদিও সেই সমষ্টিটো এইবাৰ অগপই বিচাৰিছে ।