গুৱাহাটী, ৩ অক্টোবৰ:মহানগৰীৰ বেলতলাস্থিত হোটেল ৰয়েল দি কাছাত মঙলবাৰে অনুষ্ঠিত হৈ যায় অসম এথলেটিকছ এছ’চিয়েচনৰ এখন বৰ্ধিত কার্যনিবাহক সভা । উক্ত সভাখনত অধ্যক্ষতা কৰে মন্ত্ৰী জয়ন্ত মল্লবৰুৱাই । আগন্তুক খেল মহাৰণ, গোৱাত অনুষ্ঠিতব্য নেচনেল গেমছ আৰু কলকাতাত অনুষ্ঠিতব্য ইষ্ট জ'ন জুনিঅ'ৰ এথলেটিকছ চেম্পিয়নশ্বিপৰ বিভিন্ন দিশৰ ওপৰত সভাত আলোচনা কৰা হয় । সভাৰ শেষত মন্ত্ৰী জয়ন্ত মল্লবৰুৱাই বৰ্ধিত কাৰ্যনিৰ্বাহক সভাত কি কি বিষয় আলোচনা কৰা হয় সেই সন্দৰ্ভত সাংবাদিকৰ আগত ব্যাখ্যা দাঙি ধৰে ।
মন্ত্ৰীগৰাকীয়ে কয় যে অহা ১৫ তাৰিখৰ পৰা কলকাতাত অনুষ্ঠিত হ’ব লগা ইষ্ট জ'ন জুনিঅ'ৰ এথলেটিকছ চেম্পিয়নশ্বিপ, খেল মহাৰণ, গোৱাত অনুষ্ঠিতব্য নেচনেল গেমছ আদিৰ বিভিন্ন দিশৰ ওপৰত পুংখানুপুংখকৈ সভাত আলোচনা কৰা হয় । লগতে তেওঁ কয় যে, অহা ৬ আৰু ৭ অক্টোবৰত ৰাজ্যত ইষ্ট জ'নৰ ট্ৰায়েল আৰম্ভ হ’ব । ৬ অক্টোবৰত খেলুৱৈসকল আহিব আৰু ৭, ৮ তাৰিখে ট্ৰায়েল হ’ব । তাৰ পিছত ৯ তাৰিখৰ পৰা কোচিং হ’ব । ১৫ তাৰিখৰ পৰা খেলুৱৈসকল আকৌ ইষ্ট জ’ন খেলিবলৈ যাব । ইষ্ট জ’নৰ পিছতে নেচনেল গেমছৰ বাবে প্ৰস্তুতি চলোৱা হ’ব । এনেধৰণৰ যিখিনি কাম, এই কামখিনি সকলোকে ভগাই দায়িত্ব দিয়া হৈছে ।