যোৰহাট, 12 মাৰ্চ :পৌৰসভাই অভাৱনীয় হাৰত বৃদ্ধি কৰা হোল্ডিং টেক্সৰ বিৰুদ্ধে আজি সৰৱ হৈ পৰে যোৰহাট জিলা আছুৰ প্ৰাক্তন সভাপতি তথা সমাজকৰ্মী বিজয় শংকৰ বৰদলৈৰ লগতে যোৰহাট পৌৰসভাৰ অধীনৰ বাসিন্দা সকল । হোল্ডিং টেক্স বৃদ্ধিয়ে পৌৰ এলেকাৰ বাসিন্দা সকলক যথেষ্ট পৰিমাণে প্ৰভাৱ পেলাব বুলি উল্লেখ কৰে যুৱনেতাগৰাকীয়ে । যোৰহাট জিলা ছাত্র সন্থাৰ প্ৰাক্তন সভাপতি বিজয় শংকৰ বৰদলৈয়ে কয় যে, যোৰহাট পৌৰসভাৰ হোল্ডিং টেক্স চাৰিগুণৰ পৰা দহগুণলৈ বৃদ্ধিয়ে নিম্ন মধ্যবিত্ত লোকসকলক বিশেষভাৱে প্ৰভাৱান্বিত কৰিব (Reaction on municipality tax hike in Jorhat)।
কৰ দাতা ৰাইজে জাবৰ সংগ্ৰহ আৰু পানী যোগানৰ বাবে পৌৰসভাক পৃথকে পৃথকে কৰ আদায় দিয়াৰ পিছতো হোল্ডিং টেক্সত অতিৰিক্ত কৰৰ বোজা সৰ্বসাধাৰণৰ ওপৰত জাপি দিয়াটো ন্যায্য নহয় । কাৰণ এক বহিৰাগত প্ৰতিষ্ঠানক কৰ সংগ্ৰহৰ জৰীপ প্ৰদান কৰা হ’ল ফলত যি মন যায় তাকেই জৰীপ চলাই প্ৰতিবেদন দাখিল কৰিলে বুলি অভিযোগ আনে বিজয় শংকৰ বৰদলৈয়ে ৷ কাৰণ পুৰণা ঘৰ আৰু নতুন ঘৰ এটাই কিমান কৰ আদায় দিব লাগিব সেয়া পৃথকে পৃথকে যোৰহাট পৌৰসভাই নকৰিলে বুলি কয় ৷ লগতে স্থানীয় অভিজ্ঞতা সম্পূৰ্ণ অভিযন্তাক এই জৰিপ কামত নিয়োগ নকৰাত আশ্বৰ্য প্ৰকাশ কৰে বিজয় শংকৰ বৰদলৈয়ে (Jorhat municipality board raises tax) ।