নীৰৱ সাধনাৰে চুৰি বিদ্যাৰ অনুশীলন কৰা গভাইত চোৰৰ বিলৈ

চুৰি বিদ্যা এক নীৰৱ সাধনা, যেতিয়ালৈকে এই সাধনা নীৰৱে চলি থাকে চোৰে তাৰ গুণ লাভ কৰে আৰু সাধনা আনৰ চকুত পৰিলেই ঔ-কিল ৷ শেহতীয়াকৈ যোৰহাটৰ এনে এগৰাকী চোৰৰ লগত কি হ’ল জানো আহক ৷

যোৰহাট, 9 আগষ্ট : চুৰ কৰা উত্তম বিদ্যা ধৰা, পৰিলে শিলৰ খুন্দা; এই কথাষাৰ প্ৰযোজ্য হ’ল চুৰি বিদ্যাত দীৰ্ঘদিনীয়া সাধনাৰ বলত পাণ্ডিত্য অৰ্জন কৰা বিকি দাসৰ ক্ষেত্ৰত ৷ চুৰি কাৰ্যৰ ক্ষেত্ৰখনত নিজস্ব প্ৰতিভাৰে নীৰৱ সাধনা আগবঢ়াই গৈছিল গভাইত চোৰ বিকি দাসে ৷ বিশেষকৈ সঘনাই মটৰ চাইকেল চুৰি কৰি নিজ প্ৰতিভাৰ প্ৰমাণ হিচাপে আৰক্ষীৰ নিদ্ৰা-হৰণ কৰি আহিছে চোৰটোৱে ৷

পিছে সময়ে সময়ে ভাগ্যৰ ওচৰত বহু ওস্তাদে শিৰ নত কৰিব লগীয়া হয় ৷ একেই কথা পুনৰ প্ৰমানিত হ’ল গভাইত চোৰ বিকি দাসৰ ক্ষেত্ৰতো ৷ সোমবাৰে বিয়লি যোৰাট নগৰৰ মাজ মজিয়াৰ টি আৰ পি ৰোড(TRP Road)ৰ পৰা এখন মটৰ চাইকেল চুৰি কৰিবলৈ লওতেই চোৰটোক হাতে লোতে ধৰিলে ৰাইজে ।

ঘটনাস্থলীত আৰক্ষী উপস্থিত নোহোৱালৈকে ৰাইজে উত্তম-মাধ্যম পৰিশোধ কৰি ৰচীৰে বান্ধি থ’লে চোৰ বিকিক ৷

উল্লেখযোগ্য যে, যোৰহাট নগৰৰ বিভিন্ন স্থানৰ পৰা নিমিষতে চুৰি হৈ আহিছিল বিভিন্ন প্ৰকাৰৰ মটৰ চাইকেল । আৰক্ষীৰ তহলৰ মাজতে সঘনাই এইদৰে মটৰ চাইকেল চুৰি(motor cycle thief) হোৱাৰ ঘটনাই ত্ৰাসৰ সৃষ্টি কৰিছিল নগৰখনৰ দুচকীয়া বাহনৰ গৰাকী সকলৰ মাজত ।

অৱশেষত দীৰ্ঘদিন ধৰি ত্ৰাসৰ সৃষ্টি কৰা এনে এটা চোৰ যোৰহাট বৰিগাঁৱৰ বিকি দাসক খোদ ৰাইজে আটক কৰিবলৈ সক্ষম হয় ৷ যোৰহাট আৰক্ষীয়ে চোৰটোক আৰক্ষী থানালৈ ইতিমধ্যে লৈ যোৱা বুলি জানিব পৰা গৈছে ৷

লগতে পঢ়ক :অনন্তনাগত পত্নীসহ পঞ্চায়তৰ সভাপতিক গুলীয়াই হত্যা