যোৰহাট ,১৪ মাৰ্চ: উত্তৰ পূৱ ভাৰতৰ কৃষি , কৃষক আৰু কৃষি উদ্যোগীৰ সমন্বয়েৰে যোৰহাটৰ অসম কৃষি বিশ্ববিদ্যালয়ত অনুষ্ঠিত আঞ্চলিক কৃষি মেলাৰ আজি সামৰণি পৰে । তিনিদিনীয়া বৰ্ণাঢ্য কাৰ্যসূচীৰে অনুষ্ঠিত মেলাৰ আজি অন্তিম দিনা উত্তৰ পূৱ ভাৰতৰ কৃষক আৰু কৃষি বিজ্ঞানীৰ অংশগ্ৰহণেৰে কৃষি আৰু কৃষি উদ্যোগীৰ বিভিন্ন সমস্যা সমাধানৰ প্ৰয়াসেৰে এক আলোচনা চক্ৰৰ অনুষ্ঠিত হয় (ending program of AAU krishi mela) ।
সম্প্ৰসাৰণ শিক্ষা বিভাগৰ মুৰব্বী অধ্যাপক ড° প্ৰশান্ত মিশ্ৰৰ সঞ্চালনাত অনুষ্ঠিত এই আলোচনাত অসম কৃষি বিশ্ববিদ্যালয় আৰু কৃষি বিজ্ঞান কেন্দ্ৰৰ বিজ্ঞানী সকলে কৃষকৰ সৈতে মুখামুখি বাৰ্তালাপ কৰি কৃষকসকলে সন্মুখীন হোৱা বিভিন্ন সমস্যা সমাধানকল্পে পৰামৰ্শ আগবঢ়ায় । এই অনুষ্ঠানৰ পাছতে অনুষ্ঠিত মেলাৰ সামৰণি অনুষ্ঠানত ভাৰত চৰকাৰৰ কৃষি আৰু কৃষক কল্যাণ মন্ত্ৰালয়ৰ যুটীয়া সঞ্চালক সুধীৰ কুমাৰে অংশগ্ৰহণ কৰে ।
ভাষণ প্ৰসংগত তেখেতে কয় যে ভাৰত চৰকাৰে প্ৰাকৃতিক কৃষি তথা কৃষি উদ্যোগীৰ সষ্টিৰ জৰিয়তে দেশৰ কৃষি ক্ষেত্ৰৰ উন্নতি সাধনৰ বাবে পদক্ষেপ গ্ৰহণ কৰিছে । ইয়াৰ সৎপ্ৰয়োগৰ জৰিয়তে কৃষি আৰু আনুসংগিক দিশৰ লগত জড়িত সকলো উপকৃত হব পাৰিব ।
আঞ্চলিক মেলাৰ (Anchalik krishimela of AAU ) জৰিয়তে কৃষকৰ উপৰিও উদ্যমী উদ্যোগীকো প্ৰেৰণা দি সকলোকে অধিক উজ্জীৱিত কৰিব । সভাত অসম কৃষি বিশ্ববিদ্যালয়ৰ উপাচাৰ্য ড° বিদ্যুত চন্দন ডেকাই কয় যে দেশৰ ভৱিষ্যত কৃষিয়ে নিৰ্ধাৰণ কৰি পাৰে । সেয়ে কৃষি উদ্যোগীৰ জৰিয়তে সামগ্ৰিকভাবে কৃষিক আগবঢ়াই নিবলৈ পদক্ষেপ গ্ৰহণ কৰা হৈছে ।