গোলাঘাট, 20 নৱেম্বৰঃ গোলাঘাটৰ ভিন্ন প্ৰান্তত পত্নীক বিচাৰি হাহাকাৰ এজন যুৱকৰ ৷ বিবাহৰ সাত মাহ পিছত পিতৃ গৃহলৈ আহি সন্ধানহীন পত্নী ৷ এই ঘটনা সংঘটিত হৈছে গোলাঘাটত ৷ দীপজ্যোতি কলিতা নামৰ তেজপুৰৰ এজন যুৱকে পত্নীৰ সন্ধানত গোলাঘাট জিলা সাংবাদিক সন্থাৰ কাৰ্যালয়ত উপস্থিত হয় শুকুৰবাৰে ৷ ঘটনা অনুসৰি লক ডাউনৰ পূৰ্বে গোলাঘাটৰ গীতাশ্ৰী গগৈ নামৰ যুৱতীগৰাকীৰে চিনাকি হৈছিল দীপজ্যোতিৰ ৷ ইয়াৰ পিছতে দুয়োৰে মাজত গঢ়ি উঠে প্ৰেমৰ সম্পৰ্ক ৷ আৰু তাৰ ফলশ্ৰুতিতে গীতাশ্ৰীক পলুৱাই নি বিয়া পাতি পত্নীৰ মৰ্যদা দিয়ে দীপজ্যোতিয়ে ৷
এইপৰ্যন্ত সকলো থিকেই আছিল ৷ কিন্তু বিয়াৰ 7 মাহ পিছত গীতাশ্ৰীয়ে দীপজ্যোতিক মাকৰ ঘৰলৈ যাবলৈ লগ ধৰে ৷ ফলত বিগত 18 নৱেম্বৰত দুয়ো গোলাঘাটত আহি উপস্থিত হয় ৷ গোলাঘাটত উপস্থিত হৈ গীতাশ্ৰীয়ে বাথৰূমলৈ বুলি ওলাই যায় যদিও উভটি নহাত চিন্তিত হৈ পৰে দীপজ্যোতি ৷ চাৰিওকাষে পত্নীক বিচাৰি নাপাই অৱশেষত গীতাশ্ৰীয়ে দিয়া মাকৰ ঘৰৰ ঠিকনা বিচাৰি কমাৰবন্ধাত উপস্থিত হয় ৷ কিন্তু গীতাশ্ৰীৰ মাকৰ ঘৰৰো কোনো সন্ধান লাভ নকৰে দীপজ্যোতিয়ে ৷ অৱশেষত উপায়ন্তৰ হৈ গোলাঘাট জিলা সাংবাদিক সন্থাৰ কাৰ্যালয়ত উপস্থিত হয় দীপজ্যোতি ৷