গোৱালপাৰাত পথ দুৰ্ঘটনাত নিহত ছাত্ৰ

উত্তেজিত ৰাইজে অগ্নিসংযোগ কৰিলে দূৰ্ঘটনা সংঘটিত কৰা বাহনত

গোৱালপাৰা,২২ফ্ব্ৰুৱাৰী: শুকুৰবাৰে পুৱাৰ ভাগত গোৱালপাৰা-পঞ্চৰত্ন পথত সংঘটিত হয় এক শোকাবহ পথ দুৰ্ঘটনা। অবৈধ ভাৱে ৰঙা মাটি কঢ়িওৱা এখন ট্ৰাকে মহটিয়াই নিয়ে এজন স্কুলীয়া ছাত্ৰক। ফলত দুৰ্ঘটনাটোত থিতাতে নিহত হয় পঞ্চম শ্ৰেণীৰ ছাত্ৰ হাছেন আলি ।

ইপিনে এই দুৰ্ঘটনাটোৰ পাচত ক্ষোভিত ৰাইজে জ্বলাই দিয়ে AS 18C-1653 নম্বৰৰ ট্ৰাকখন । জ্বলাই দিয়া ট্ৰাকখনৰ জুই নুমুৱাবলৈ অহা অগ্নিনিৰ্বাপক বাহিনীক ক্ষোভিত ৰাইজে বাধা প্ৰদান কৰে। অৱশ্যে আৰক্ষীৰ সহযোগত জুই নুমুৱাবলৈ সক্ষম হয় যদিও গাড়ীখন সম্পূৰ্ণৰূপে জুইত ভস্মীভূত হয় ।

উল্লেখ্য যে অঞ্চলটোত বহুদিন ধৰি পৰ্যাপ্ত নথি-পত্ৰ নথকা বাহনে ত্ৰাস চলাই অহাৰ অভিযোগ স্থানীয় একাংশ সচেতন ৰাইজৰ । লগতে শুকুৰবাৰৰ এই দুৰঘটনাৰ পাচতে প্ৰশাসন তথা চৰকাৰক এনেদৰে অবাধে চলাচল কৰা বাহন সমূহক নাকী লগোৱাৰ আহ্বান জনায়।