ডিব্ৰুগড়,২৪ মাৰ্চ: অৱশেষত ঘোষণা কৰা হ'ল ঐতিহ্যমণ্ডিত ডিব্ৰুগড় বিশ্ববিদ্যালয়ৰ স্নাতকোত্তৰ ছাত্ৰ একতা সভাৰ সাধাৰণ নিৰ্বাচনৰ দিন । ৰাজ্যত বিধানসভা নিৰ্বাচনৰ বাবে ভোটগ্ৰহণ প্ৰক্ৰিয়া শেষ হোৱাৰ পাছতেই আৰম্ভ হ'ব উজনি অসমৰ উচ্চ শিক্ষাৰ প্ৰাণকেন্দ্ৰ ডিব্ৰুগড় বিশ্ববিদ্যালয়ৰ নিৰ্বাচন । পূৰ্বে ৩ বাৰকৈ নিৰ্বাচনৰ দিন ঘোষণা কৰা হৈছিল যদিও নিৰ্বাচন অনুষ্ঠিত হোৱা নাছিল ।
৮ এপ্ৰিলত অনুষ্ঠিত হ'ব বিশ্ববিদ্যালয়খনৰ ছাত্ৰ একতা সভাৰ সাধাৰণ নিৰ্বাচন । বহু বাদ-বিসম্বাদ, ছাত্ৰ আন্দোলন আদিৰ বাবে ডিব্ৰুগড় বিশ্ববিদ্যালয়ৰ স্নাতকোত্তৰ ছাত্ৰ একতা সভাৰ সাধাৰণ নিৰ্বাচন নিৰ্ধাৰিত দিনত অনুষ্ঠিত হোৱা নাছিল । শেহতীয়াকৈ বিশ্ববিদ্যালয়ে তিনিবাৰকৈ দিন ঘোষণা কৰাৰ পাছতো অনুষ্ঠিত কৰা নহ'ল নিৰ্বাচন । ২০১৮-১৯ আৰু ২০১৯-২০ বৰ্ষৰ নিৰ্বাচন অনুষ্ঠিত নহৈ এইবাৰ ২০২০-২০২১ বৰ্ষৰ বাবে নিৰ্বাচন অনুষ্ঠিত হোৱাৰ সম্ভাৱনা আছে ৷
উল্লেখ্য যে, ডিব্ৰুগড় বিশ্ববিদ্যালয়ৰ আছু গোট আৰু অন্যান্য সমৰ্থনৰ দুই গোটৰ মাজত এই নিৰ্বাচনক লৈ তীব্ৰ বাদ-বিসম্বাদ সৃষ্টি হৈছে । আন্দোলনতো নামি পৰিছে একাংশ ছাত্ৰ, যাৰ পৰিপ্ৰেক্ষিতত বিশ্ববিদ্যালয়ে ইয়াৰ পূৰ্বে তিনিবাৰকৈ নিৰ্বাচনৰ দিন ঘোষণা কৰিও বাতিল কৰিবলগা হৈছে নিৰ্বাচন । এইবাৰ পুনৰ বিশ্ববিদ্যালয়ৰ নিৰ্বাচনৰ দিন ঘোষণা কৰা হৈছে । বৃহস্পতিবাৰে অৰ্থাৎ ২৫ মাৰ্চৰ পৰা মনোনয়ন পত্ৰ সংগ্ৰহ কৰিব পাৰিব প্ৰাৰ্থীসকলে ।