পশ্চিম বিলাসীপাৰা,১৩ মাৰ্চ:ধুবুৰী জিলাৰ অন্তৰ্গত বিলাসীপাৰা শিক্ষা খণ্ডত ছাত্ৰ-ছাত্ৰীৰ ইউনিফৰ্মক লৈ চলিছে ব্যাপক ছিণ্ডিকেট (School uniform syndicate in Bilasipara)। শিক্ষাৰ্থীৰ ইউনিফৰ্মৰ নামত অহা ধন খণ্ড প্ৰাথমিক শিক্ষা বিষয়াই আত্মসাৎ কৰাৰ অভিযোগ । ছিণ্ডিকেটত বিদ্যালয়সমূহৰ প্ৰধান শিক্ষক, চি আৰ চি চি, বিদ্যালয় পৰিচালনা সমিতি আৰু একাংশ এণ্টাৰপ্ৰাইজ জড়িত থকাৰ অভিযোগ । সমগ্ৰ বিষয়টোত শিক্ষা বিভাগত তদন্ত কৰিবলৈ দাবী বিভিন্ন দল-সংগঠনৰ ।
চৰকাৰে যোগান ধৰা কণ কণ স্কুলীয়া ছাত্ৰ-ছাত্ৰীৰ ইউনিফৰ্মৰ ধনত নজৰ দিছে শিক্ষা বিষয়া, চি আৰ চি চি, প্ৰধান শিক্ষক, বিদ্যালয় পৰিচালনা সমিতি আৰু একাংশ এন্টাৰপ্ৰাইজে । এই অভিযোগ একাংশ শিক্ষাৰ্থী, অভিভাৱক আৰু সংগঠনৰ । যাৰ বাবে ধুবুৰী জিলাৰ বহু বিদ্যালয়ত ইতিমধ্যে শিক্ষাৰ্থী আৰু অভিভাৱকসকলে প্ৰতিবাদ সাব্যস্ত কৰি আহিছে (Protest against school uniform scam)।
উল্লেখ্য যে চৰকাৰে প্ৰথম শ্ৰেণীৰ পৰা অষ্টম শ্ৰেণীৰ প্ৰতিগৰাকী ছাত্ৰ-ছাত্ৰীৰ বাবে ৬০০ টকাৰ বিনিময়ত বছৰি যোগান ধৰি আহিছে দুযোৰকৈ ইউনিফৰ্ম । একেদৰে নৱম আৰু দশম শ্ৰেণীৰ প্ৰতিগৰাকী ছাত্ৰ-ছাত্ৰীৰ বাবে ৭০০ টকাৰ বিনিময়ত বছৰি যোগান ধৰিছে দুযোৰকৈ ইউনিফৰ্ম (School uniform scam in Bilasipara)।