নাবালিকাৰ লগত বিবাহ প্ৰাক্তন মন্ত্ৰী নুৰজামাল চৰকাৰৰ ভতিজাকৰ

বলপূৰ্বকভাৱে শাৰিৰীক সম্পৰ্ক স্থাপন কৰি জেললৈ যোৱাৰ ভয়ত নাবালিকাৰ সৈতে বিবাহ কৰিলে প্ৰাক্তন মন্ত্ৰী নুৰজামাল চৰকাৰৰ ভতিজা চফিকুল ইছলামে ৷ এই অপৰাধত ১৪ বছৰীয়া কিশোৰী গৰাকীৰ সৈতে বিবাহ সম্পন্ন কৰা চৰকাৰী কাজী মহম্মদ জৈনুদ্দিনক গ্ৰেপ্তাৰ কৰি ন্যায়িক জিম্মালৈ প্ৰেৰণ আৰক্ষীৰ

বিশ্বনাথ,15 অক্টোবৰ : ধৰ্ষণৰ দৰে জঘন্য ঘটনা সংঘটিত কৰি সমগ্ৰ ঘটনা লুকুৱাৰ স্বাৰ্থত এগৰাকী ১৪ বছৰীয়া নাবালিকাৰ লগত আইনৰ গণ্ডীৰ পৰা বাচিবৰ বাবে বিবাহ কৰাৰ এক ভয়ংকৰ ঘটনা শেহতীয়াকৈ পোহৰলৈ আহিছে বিশ্বনাথ চাৰিআলিত ৷ চফিকুল ইছলাম নামৰ এজন যুৱকে এগৰাকী নাবালিকাক বিদ্যালয়ৰ পৰা ফুচুলাই নি বলপূৰ্বকভাৱে শাৰিৰীক সম্পৰ্ক কৰাৰ অভিযোগ উত্থাপিত হৈছে ৷ প্ৰেমৰ নামত দিলীপ নামৰ এজন বন্ধুৰ সহযোগত নাবালিকা গৰাকীক ফুচুলাই নি তেজপুৰত ৰাখি চফিকুলে সংঘটিত কৰিছিল এই দুষ্কাৰ্য ৷ অভিযুক্ত চফিকুল ইছলাম হৈছে প্ৰাক্তন মন্ত্ৰী নুৰজামাল সৰকাৰৰ ভতিজা ৷ আনহাতে এই ঘটনাৰ পিছত নাটকীয়ভাৱে চফিকুলে আইনৰ পৰা হাত সাৰিবলৈ বিবাহ কৰে ১৪ বছৰীয়া কিশোৰী গৰাকীক ৷ কিশোৰী গৰাকীৰ পিতৃ আৰু মাতৃক হত্যা কৰাৰ ভাবুকি প্ৰদান কৰি কিশোৰী গৰাকীৰ পৰা বলপূৰ্বকভাৱে নিকাহ নামাত চহী কৰাইছিল চফিকুলে ৷ এটা কোঠাত কেইবাদিনো বন্দী কৰি থোৱা হৈছিল কিশোৰী গৰাকীক ৷ কিশোৰী গৰাকীক মুকলি কৰি দিম বুলি কৌশলৰে মাতৃৰ পৰাও কাগজত কৰাইছিল চহী ৷ কিন্তু বিবাহৰ কিছুদিন পিচৰে পৰা কিশোৰী গৰাকীৰ ওপৰত চফিকুল আৰু পৰিয়ালে চলাবলৈ আৰম্ভ কৰে অকথ্য নিৰ্যাতন ৷ ৫ লাখ টকা যৌতুক হিচাপে বিচাৰি আৰম্ভ কৰে হাৰাশাস্তি ৷ ৫ লাখ টকা দিব নোৱাৰিলে মন্ত্ৰীৰ ঘৰৰ বোৱাৰী হিচাপে স্বীকৃতি নিদিয়াৰ কথা বাৰে বাৰে কৈছিল চফিকুলৰ মাতৃয়ে ৷ আনকি কিশোৰী গৰাকীক বিহ খুৱাই হত্যা কৰাৰো চেষ্টা চলোৱাৰ অভিযোগ উত্থাপন কৰে কিশোৰীগৰাকীৰ পৰিয়ালে ৷ উপায়ন্তৰ হৈ মাতৃগৃহত থাকিবলৈ বাধ্য হয় কিশোৰী গৰাকী ৷ কিন্তু শহুৰেকে মাতি নি পুনৰ ঘৰত মাৰধৰ কৰে ৷ অৱশেষত কিশোৰী গৰাকীৰ জীৱনৰ সুৰক্ষাৰ প্ৰতি লক্ষ্য ৰাখি মাতৃ বাধ্য হয় আদালতত গোচৰ তৰিবলৈ ৷ গোচৰ তৰাৰ পিছতেই সোমবাৰে নিশা অস্ত্ৰধাৰী দুৰ্বৃত্তই কিশোৰী গৰাকীৰ ঘৰলৈ আহি পৰিয়ালটোক হত্যা কৰাৰ চেষ্টা চলাই যদিও ওচৰ চুবুৰীয়া ওলাই অহাত দুৰ্বৃত্তৰ দলটোৱে পলায়ন কৰে ৷ এই সমগ্ৰ ঘটনাৰ সন্দৰ্ভত ভুক্তভোগী পৰিয়ালটোৱে আৰক্ষী থানাত এজাহাৰ দাখিল কৰিছে ৷ ইফালে এই ঘটনা পোহৰলৈ অহাৰ পিছত ১4 বছৰ বয়সতে কিশোৰী গৰাকীৰ নিকাহ সম্পন্ন কৰা চৰকাৰী কাজী মহম্মদ জৈনুদ্দিনক ইতিমধ্যে আৰক্ষীয়ে গ্ৰেপ্তাৰ কৰি ন্যায়িক জিম্মালৈ প্ৰেৰণ কৰিছে ৷

উল্লেখযোগ্য যে বিশ্বনাথৰ আৰৱী মহাবিদ্যালয়ত অধ্যাপনা কৰা মহম্মদ জৈনুদ্দিন এগৰাকী চৰকাৰী স্বীকৃতিপ্ৰাপ্ত কাজী আৰু বিশ্বনাথঘাট নিবাসী এই গৰাকী কাজিয়েই অবৈধভাৱে এগৰাকী নাবালিকাৰ নিকাহ সম্পন্ন কৰিছিল ৷ প্ৰাক্তন মন্ত্ৰী নুৰজামাল চৰকাৰৰ পৰিয়ালৰ লোকে এনে দুষ্কাৰ্য সংঘটিত কৰাৰ ঘটনা পোহৰলৈ অহাত বিশ্বনাথ চাৰিআলিত তীব্ৰ চাঞ্চল্যৰ সৃষ্টি হৈছে ৷