বৰপেটা, ১৭ জুলাইঃ মহামাৰী কৰ'ণা আৰু লক ডাউনে কঢ়িয়াই অনা ভয়াৱহ অৰ্থনৈতিক অৱস্থাৰ পৰিপ্ৰেক্ষিতত বৃহস্পতিবাৰে নিশা পুনৰ আত্মহত্যাৰ পথ বাছি লয় জিলাখনৰ কুজিদ' হাটীৰ অমেন দাস নামৰ এজন গাড়ী চালকে ৷ বৰপেটা বাছ আস্থানৰ কাষৰ বাছ মালিক সন্থাৰ কাৰ্যালয়ৰ সন্মুখতে আত্মহত্যা কৰে বাছ চালকজনে ৷বৰপেটাৰ বাছ চালক সন্থাই প্ৰকাশ কৰে মতে,অভাৱৰ তাড়নাত পৰিয়েই আত্মহত্যা কৰিছে বাছ চালকজনে ৷ চহৰখনত এনেদৰে আত্মহননৰ পথ বাছি লোৱা অমেন দাস হৈছে তৃতীয়জন ব্যক্তি ৷ আজিৰ পৰা প্ৰায় এমাহ পূৰ্বে অনাটনত পৰি আত্মহত্যা কৰিছিল নিকুঞ্জ দাস নমাৰ লোকজনে ৷ সমান্তৰালকৈ লক ডাউনৰ মাজতে আত্মহত্যা কৰিছিল অন্য এজন গাড়ী চালকে ৷
ক্ষতিগ্ৰস্ত পৰিবহন ব্যৱসায়ঃ অভাৱৰ তাড়নাত চালকৰ আত্মহনন লগতে পঢ়কঃ শোকাকুল পৰিৱেশৰ মাজেৰে আদ্যশ্ৰাদ্ধ সম্পন্ন ঋষভ দত্তৰ
উল্লেখ্য যে,লক ডাউনৰ ফলত সৰ্বাধিক ক্ষতিৰ সন্মুখীন হৈছে ব্যক্তিগত খণ্ডৰ পৰিবহন ব্যৱসায় ৷ বৰপেটাৰ প্ৰায় চাৰি শতাধিক লোকে বাছৰ চালক,পৰিচালক আৰু হেণ্ডিমেন হিচাপে জীৱিকা নিৰ্বাহ কৰি আহিছে ৷ পূৰ্বে দিনৰ দিনটো যাত্ৰীবাহী বাছ চলাই পৰিয়াল পোহপাল দিয়া লোকসকল লক ডাউনৰ ফলত প্ৰায় কৰ্মহীন হৈ পৰিছে ৷ দুই এখন বাছ চলাচল কৰি আছে যদিও যাত্ৰীৰ অভাৱত লোকচানৰ সন্মুখীন হ'বলগীয়া হৈছে পৰিবহন ব্যৱসায়ৰ লগত জৰিত লোকসকল ৷
যাৰ বাবে অভাৱৰ তাড়নাত পৰি এজন এজনকৈ এতিয়ালৈকে বৰপেটা চহৰৰে তিনিজনকৈ চালকে আত্মহত্যা কৰিবলগীয়া হ'ল বুলি ক্ষোভ প্ৰকাশ কৰিছে বাছ শ্ৰমিক সন্থাই ৷ মহামাৰী কৰ'ণা আৰু লক ডাউনৰ প্ৰভাৱত ভয়াৱহ আৰ্থিক সমস্যাৰ সন্মুখীন হোৱা বাছ শ্ৰমিক বা পৰিবহনৰ সৈতে জৰিত শ্ৰমিকসকলক সহায়ৰ হাত আগবঢ়াবলৈ ৰাজ্য চৰকাৰক আহ্বান জনাইছে বৰপেটা বাছ শ্ৰমিক সন্থাই ৷
