স্পৰ্টছ ডেস্ক, ১৯ জানুৱাৰী :ভাৰতীয় ক্ৰিকেট দলৰ প্ৰাক্তন অধিনায়ক মহেন্দ্ৰ সিং ধোনীৰ নতুন ৰূপক লৈ অনুৰাগীৰ মাজত ব্যাপক চৰ্চা চলিছে । দীঘল চুলিৰ এই ৰূপটোৱে অনুৰাগীসকলক যথেষ্ট আকৰ্ষণ কৰিবলৈও সক্ষম হৈছে । আন্তঃৰাষ্ট্ৰীয় ক্ৰিকেটত প্ৰথম খোজ দিয়াৰ সময়ত ধোনীৰ যি ৰূপ আছিল, পুনৰ এবাৰ তেনে ৰূপ দেখি আপ্লুত অনুৰাগী ৷
শেহতীয়াকৈ মহেন্দ্ৰ সিং ধোনীৰ এটা ভিডিঅ' সামাজিক মাধ্যমত ভাইৰেল হৈ পৰিছে । এই ভিডিঅ'টো হকী খেলপথাৰৰ আছিল । য'ত ধোনীয়ে ভাৰতীয় মহিলা হকী দলক সমৰ্থন কৰিবলৈ গৈছিল । তেওঁৰ অনুৰাগীসকলে এই ভিডিঅ'টো সামাজিক মাধ্যমত শ্বেয়াৰ কৰা দেখা গৈছে ।
উল্লেখ্য যে, ভাৰতীয় মহিলা হকী দলে ৰাঁচীৰ জয়পাল সিং মুণ্ডা এষ্ট্ৰোটাৰ্ফ হকী ষ্টেডিয়ামত অলিম্পিকৰ যোগ্যতা অৰ্জনৰ বাবে খেলি আছে । শেহতীয়াকৈ হৈ যোৱা এখন খেলত ধোনীয়েও দলটোৰ সমৰ্থনৰ বাবে ষ্টেডিয়াম উপস্থিত হৈছিল । এই সময়ছোৱাত তেওঁ অনুৰাগীসকলৰ বাবে আকৰ্ষণৰ কেন্দ্ৰবিন্দু হৈ পৰিছিল ।