নিউজ ডেস্ক, ২ জানুৱাৰী:জম্মুৰ ডাংগ্ৰী গাঁৱত মাত্ৰ ১৪ ঘণ্টাত সংঘটিত দুটাকৈ আক্ৰমণৰ ঘটনাই ৰাজ্যখনত তীব্ৰ চাঞ্চল্যৰ সৃষ্টি কৰিছে (Terror attack in Jammu Kashmir) ৷ মাত্ৰ এদিন পূৰ্বে অঞ্চলটোত সন্ত্ৰাসবাদী আক্ৰমণত নিহত এজন লোকৰ ঘৰৰ ওচৰত সোমবাৰে সংঘটিত হয় আই ই ডি বিস্ফোৰণ ৷ এই বিস্ফোৰণত এটি ৪ বছৰীয়া শিশু আৰু এগৰাকী মহিলা নিহত হোৱাৰ লগতে তিনিটি শিশুকে ধৰি সাতজন লোক আহত হয় । ইয়াৰ লগতে ডাংগ্ৰী গাঁৱত সন্ত্ৰাসবাদী আক্ৰমণত নিহত লোকৰ সংখ্যা ছয়গৰাকীলৈ বৃদ্ধি পাইছে (Explosion after civilian killings in Dangri) ৷ ৰাজ্যখনৰ কেইবাগৰাকী নেতাই এই ঘটনাক তীব্ৰ ভাষাৰে গৰিহণা দিছে । এই আক্ৰমণৰ শেহতীয়া তথ্যসমূহ এনেধৰণৰ:
1. ৰাজৌৰীত দেওবাৰে চাৰিগৰাকী নাগৰিক নিহত হোৱাৰ ঠিক এদিন পিছতে অৰ্থাৎ সোমবাৰে আইইডি বিস্ফোৰণত দুজন লোক নিহত হয় ৷ এই ঘটনাত গুৰুতৰভাৱে আহত হয় আন 9 জন লোক । সন্ত্ৰাসবাদীয়ে পূৰ্বে আক্ৰমণৰ ঘটনা সংঘটিত কৰা স্থানত এজন ভুক্তভোগী ঘৰৰ ওচৰত এই আক্ৰমণৰ ঘটনা সংঘটিত কৰে(Dangri killings ) ৷ আজিৰ বিস্ফোৰণত বিহান কুমাৰ নামৰ এটি চাৰি বছৰীয়া শিশু আৰু এগৰাকী ৪০ বছৰীয়া মহিলা নিহত হয় ।
2. প্ৰত্যক্ষদৰ্শীয়ে সদৰী কৰা অনুসৰি পুৱা প্ৰায় ৯.৩০ বজাত বিস্ফোৰণটো সংঘটিত হৈছিল (Dangri explosion) ৷ এই বিস্ফোৰণস্থলীত দেওবাৰে আক্ৰমণৰ ভুক্তভোগীৰ আত্মীয়সহ কেইবাজনো লোক আছিল । তেওঁলোক ক্ৰমে চানবী শৰ্মা (৪), কনয়া শৰ্মা (১৪), ভাংশু শৰ্মা (১৫), সমীক্ষা দেৱী (২০), শাৰদা দেৱী (৩৮), কমলেশ দেৱী (৫৫) আৰু সমীক্ষা শৰ্মা ৷ সম্প্ৰতি তেওঁলোক স্থানীয় চিকিৎসালয়ত চিকিৎসাধীন হৈ আছে ।
3. ৰাষ্ট্ৰীয় অনুসন্ধান সংস্থা চমুকৈ নিয়াৰ (National Investigation Agency) এটা দলে প্ৰাৰম্ভিক তদন্ত কৰিবলৈ ডাংগ্ৰীত উপস্থিত হৈছে ৷ জম্মুৰ এডিজিপি মুকেশ সিঙে জানিবলৈ দিয়া অনুসৰি সম্প্ৰতি সমগ্ৰ অঞ্চলটোত কটকটীয়া নিৰাপত্তা বেষ্টনী গঢ়ি তোলা হৈছে ৷ আৰক্ষী, সেনা আৰু চিআৰপিএফৰ বিষয়াসকলে দুয়োটা আক্ৰমণৰ লগত জড়িত লোকসকলক বিচাৰি বৃহৎ তালাচী অভিযান আৰম্ভ কৰিছে । এই অভিযান অধিক তীব্ৰতৰ কৰিবলৈ নিৰাপত্তাৰক্ষীৰ সংখ্যা বৃদ্ধি কৰা হৈছে ।
4. দেওবাৰৰ আক্ৰমণৰ অভিযুক্ত সন্ত্ৰাসবাদী দুটাই ইজনে সিজনৰ পৰা প্ৰায় ৫০ মিটাৰ দূৰত্বত অৱস্থান কৰি তিনিটা ঘৰলৈ লক্ষ্য কৰি গুলীচালনা কৰিছিল ৷ এই ঘটনাত চাৰিজন লোক নিহত হয় আৰু ছয়জন গুৰুতৰভাৱে আহত হয় । শান্তিপূৰ্ণ জম্মু অঞ্চলত বিগত কেইবাবছৰৰ পাছত সংঘটিত এইটো প্ৰথম আক্ৰমণৰ ঘটনা ৷ নতুন বছৰৰ প্ৰথম দিনাই সংঘটিত হৈছিল এই আক্ৰমণৰ ঘটনা ৷
5. প্ৰত্যক্ষদৰ্শীয়ে জনোৱা অনুসৰি, সন্ত্ৰাসবাদীকেইটাই সন্ধিয়া প্ৰায় ৭ বজাত গাঁওখনত উপস্থিত হৈছিল আৰু প্ৰায় ১০ মিনিট সময় নিৰ্বিচাৰ গুলীচালনা কৰিছিল । সন্ত্ৰাসবাদী দুটাই ইয়াৰ পাছত ঘটনাস্থলীৰ পৰা পলায়ন কৰিছিল । এই গুলি চালনাত মুঠ ১০ জন লোক আহত হৈছিল । ইয়াৰে তিনিজনক চৰকাৰী চিকিৎসা মহাবিদ্যালয়ত ভৰ্তি কৰাৰ পাছত মৃত ঘোষণা কৰা হয় ৷ আনহাতে এজন চিকিৎসাধীন অৱস্থাত মৃত্যু হয় ৷ নিহতসকলক সতীশ কুমাৰ (৪৫), দীপক কুমাৰ (২৩), প্ৰীতম লাল (৫৭) আৰু শিশু পাল (৩২) বুলি চিনাক্ত কৰা হৈছে ।