ত্ৰিপুৰাত SFI নেতাৰ বাসগৃহত দুৰ্বৃত্তৰ আক্ৰমণ

ত্ৰিপুৰাত অব্যাহত আছে বামপন্থী নেতা-কৰ্মীৰ ওপৰত আক্ৰমণৰ ঘটনা ৷ শেহতীয়াকৈ দেওবাৰ মাজনিশা এছএফআইৰ ৰাজ্যিক সচিব সন্দীপন দেৱৰ বাসগৃহত এদল দুৰ্বৃত্তই প্ৰৱেশ কৰি চলায় আক্ৰমণ ৷ ত্ৰিপুৰাৰ মুখ্যমন্ত্ৰী আৰু ৰাজ্যপালে আক্ৰমণক গৰিহণা দিয়াৰ লগতে তদন্তৰ আশ্বাস প্ৰদানৰ পাছতো সংঘটিত এই ঘটনাই সৃষ্টি কৰিছে তীব্ৰ প্ৰতিক্ৰিয়াৰ ৷

আগৰতলা, 15 জুন : ত্ৰিপুৰাত বামপন্থী নেতাসকলক আক্ৰমণ আৰু ভাবুকি প্ৰদান কৰাৰ পাছত এইবাৰ দুৰ্বৃত্তৰ দলে এছএফআই(SFI)ৰ নেতাৰ বাসগৃহত আক্ৰমণ চলায় ৷ দেওবাৰ মাজনিশা এছএফআইৰ ৰাজ্যিক সচিব সন্দীপন দেৱৰ বাসগৃহত এদল দুৰ্বৃত্তই প্ৰৱেশ কৰি আক্ৰমণ চলাই বিভিন্ন আচবাব লণ্ড-ভণ্ড কৰে ৷ পৰৱৰ্তী সময়ত চিঞৰ-বাখৰ শুনি স্থানীয় ৰাইজ ঘটনাস্থলীত উপস্থিত হোৱাত দুৰ্বৃত্তৰ দলটোৱে উক্ত ঠাইৰ পৰা পলায়ন কৰে ৷

ইফালে ত্ৰিপুৰাৰ বিৰোধী ৰাজনৈতিক দলে এই ঘটনাৰ বাবে শাসকীয় দলৰ ওপৰত অভিযোগৰ আঙুলি টোৱাইছে ৷ ত্ৰিপুৰাৰ মুখ্যমন্ত্ৰী আৰু ৰাজ্যপালে এনে আক্ৰমণক গৰিহণা দিয়াৰ লগতে তদন্তৰ আশ্বাস প্ৰদানৰ পাছতো বামপন্থী নেতা-কৰ্মীৰ ওপৰত আক্ৰমণৰ ঘটনা হ্ৰাস পোৱা নাই ৷ যাৰ ফলত এতিয়া বিৰোধী নেতাসকলে ঘটনাটো দুৰ্ভাগ্যজনক আখ্যা দি মুখ্যমন্ত্ৰী বিপ্লৱ কুমাৰ দেৱ(Biplab Kumar Deb)ৰ বিৰুদ্ধে সৰৱ হৈ পৰিছে ৷

এই ঘটনাৰ পাছতে সোমবাৰে ডিৱাইএফআই(DYFI) আৰু টিৱাইএফ(TYF) ৰ নেতাসকলে আৰক্ষী মুখ্য কাৰ্যালয়ৰ বাহিৰত প্ৰতিবাদ সাব্যস্ত কৰি তৎকালীনভাৱে উক্ত আক্ৰমণৰ সঠিক তদন্ত কৰি ঘটনাৰে জড়িত অভিযুক্তক আটক কৰিবলৈ দাবী জনায় ৷ উক্ত আক্ৰমণৰ ঘটনাই সম্প্ৰতি ত্ৰিপুৰাৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি কৰিছে ৷

লগতে পঢ়ক : ব’ৰ্ডৰ পৰীক্ষাত কৰ’ণাৰ বাধা: ত্ৰিপুৰাত JEE পৰীক্ষা স্থগিত