নিউজ ডেস্ক, 17 জানুৱাৰী :‘‘ইণ্ডি মিত্ৰজোঁটৰ বহু চৰ্চিত আসন ভাগ-বতৰাৰ সন্দৰ্ভত আলোচনা চলি আছে ৷ আলোচনাৰ মাজেৰে আসন ভাগ-বতৰাৰ সমস্যা শীঘ্ৰে সমাধান কৰা হ’ব ৷’’ ভাৰত জোড়ো ন্যায় যাত্ৰাস্থলীৰ পৰাই এই ঘোষণা কৰিছে কংগ্ৰেছ নেতা ৰাহুল গান্ধীয়ে ৷ মঙলবাৰে এক সংবাদমেল সম্বোধন কৰি তেওঁ কয় যে, I.N.D.I.Aৰ অংশীদাৰী দলসমূহৰ সৈতে আসন ভাগ-বতৰাৰ বাবে আলোচনা চলি আছে ৷ আমাৰ ৰাজনৈতিক দলৰ নেতাসকলৰ মাজত আছে পাৰস্পৰিক সন্মান আৰু মৰম ৷
তেওঁ লগতে কয়, ‘‘মই যথেষ্ট আত্মবিশ্বাসী যে আসন ভাগ বতৰা সমস্যাটো শীঘ্ৰে সমাধান কৰা হ'ব ৷’’ আনহাতে বিহাৰৰ মুখ্যমন্ত্ৰী নীতিশ কুমাৰে ইণ্ডিৰ মিত্ৰজোঁটৰ অন্তিমখন বৈঠকত উপস্থিত নথকাৰ সন্দৰ্ভত সোধা প্ৰশ্নৰ উত্তৰত গান্ধীয়ে কয় যে, সংবাদ মাধ্যমসমূহে এই বিষয়বোৰত অত্যধিক গুৰুত্ব দিয়ে যাৰ ফলত মিত্ৰজোঁটৰ বৈঠকৰ সময়ত মনোভাৱ আৰু ভাতৃত্ববোধৰ ভংগ হয় ৷ ইণ্ডি মিত্ৰজোঁটৰ নেতাসকলৰ মাজত পাৰস্পৰিক সন্মান আৰু মৰম আছে ৷ যিয়ে বিজেপি আৰু আৰ এছ এছৰ বাবে চিন্তাৰ কাৰণ হৈ পৰিছে ৷ একেলগে নিৰ্বাচনত বিজেপিৰ বিৰুদ্ধে যুঁজ দিম আৰু দেশৰ পৰা বিজেপিক উৎখাত কৰিব পাৰিম বুলি আত্মবিশ্বাসী বুলি ক’লে গান্ধীয়ে ৷