বিহাৰক বিশেষ মৰ্যাদা দিবলৈ কেন্দ্ৰক অনুৰোধ; নীতিশ কেবিনেটত গৃহীত প্ৰস্তাৱ

নীতিশ কেবিনেটৰ বৈঠকত বিহাৰক বিশেষ মৰ্যাদা দিবলৈ কেন্দ্ৰীয় চৰকাৰক অনুৰোধ জনোৱাৰ বাবে এক প্ৰস্তাৱ গৃহীত কৰা হৈছে । বিহাৰৰ মুখ্যমন্ত্ৰী নীতিশ কুমাৰে পুনৰবাৰ ছ'চিয়েল মিডিয়া পোষ্টত বিশেষ শ্ৰেণীৰ মৰ্যাদাৰ দাবী দোহাৰিছে । লগতে কয় যে আঁচনিসমূহ ৰূপায়ণৰ বাবে প্ৰায় ২,৫০,০০০ কোটি টকাৰ প্ৰয়োজন ।

নিউজ ডেস্ক, ২২ নৱেম্বৰ :বিহাৰৰ মুখ্যমন্ত্ৰী নীতিশ কুমাৰে নিৰন্তৰভাৱে বিহাৰক বিশেষ ৰাজ্যৰ মৰ্যাদা প্ৰদানৰ দাবী কৰি আহিছে । আনহাতে, এই সন্দৰ্ভত বুধবাৰে কেবিনেট বৈঠকত এটা প্ৰস্তাৱো গৃহীত কৰা হয় । একে সময়তে মুখ্যমন্ত্ৰীগৰাকীয়ে ছ'চিয়েল মিডিয়া এক্সত এক দীঘলীয়া পোষ্টত বিহাৰৰ বাবে বিশেষ মৰ্যাদা দাবী কৰিছে ।

নীতিশ কুমাৰে তাত লিখিছে যে দেশত প্ৰথমবাৰৰ বাবে বিহাৰত জাতিভিত্তিক পিয়ল কৰা হৈছে । জাতিভিত্তিক পিয়লৰ সামাজিক, অৰ্থনৈতিক আৰু শৈক্ষিক স্থিতিৰ তথ্যৰ ওপৰত ভিত্তি কৰি অনুসূচিত জাতিৰ বাবে সংৰক্ষণৰ সীমা ১৬ শতাংশৰ পৰা ২০ শতাংশলৈ বৃদ্ধি কৰা হৈছে । আনহাতে, অনুসূচিত জনজাতিৰ বাবে সংৰক্ষণ সীমা ১ শতাংশৰ পৰা ২ শতাংশলৈ বৃদ্ধি কৰা হৈছে ।

ইয়াৰ উপৰি আটাইতকৈ পিছপৰা শ্ৰেণীৰ বাবে সংৰক্ষণৰ সীমা ১৮ শতাংশৰ পৰা ২৫ শতাংশলৈ বৃদ্ধি কৰা হৈছে আৰু পিছপৰা শ্ৰেণীৰ বাবে সংৰক্ষণ সীমা ১২ শতাংশৰ পৰা ১৮ শতাংশলৈ বৃদ্ধি কৰা হৈছে । অৰ্থাৎ সামাজিকভাৱে দুৰ্বল শ্ৰেণীৰ বাবে সংৰক্ষণ সীমা ৫০ শতাংশৰ পৰা ৬৫ শতাংশলৈ বৃদ্ধি কৰা হৈছে । সাধাৰণ শ্ৰেণীৰ অৰ্থনৈতিকভাৱে দুৰ্বল শ্ৰেণীৰ বাবে ১০ শতাংশ সংৰক্ষণ অপৰিৱৰ্তিত হৈ থাকিব ।

অৰ্থাৎ এই সকলোকেইটা শ্ৰেণীৰ বাবে মুঠ সংৰক্ষণ সীমা ৭৫ শতাংশলৈ বৃদ্ধি কৰা হৈছে । জাতিভিত্তিক পিয়লত বিহাৰত সকলো শ্ৰেণীকে ধৰি প্ৰায় ৯৪ লাখ দৰিদ্ৰ পৰিয়াল পোৱা গৈছে । ইয়াৰে প্ৰতিটো পৰিয়ালৰ এজন সদস্যক সংস্থাপনৰ বাবে কিস্তি হিচাপত ২ লাখ টকালৈকে প্ৰদান কৰা হ'ব ।

আনহাতে, ভূমি ক্ৰয়ৰ বাবে ৬৩,৮৫০ গৃহহীন আৰু ভূমিহীন পৰিয়ালক দিয়া ৬০,০০০ টকাৰ সীমা ১ লাখ টকালৈ বৃদ্ধি কৰা হৈছে । লগতে গৃহ নিৰ্মাণৰ বাবে এই পৰিয়ালবোৰক ১ লাখ ২০ হাজাৰ টকাকৈ প্ৰদান কৰা হ'ব । জুপুৰীত বাস কৰা ৩৯ লাখ পৰিয়ালকো পকীঘৰ প্ৰদান কৰা হ'ব । ইয়াৰ বাবে প্ৰতিটো পৰিয়ালক ১ লাখ ২০ হাজাৰ টকাকৈ প্ৰদান কৰা হ'ব ।

বহনক্ষম জীৱিকা আঁচনিৰ অধীনত অত্যন্ত দৰিদ্ৰ পৰিয়ালবোৰক সহায় কৰিবলৈ বৰ্তমানৰ ১ লাখ টকাৰ পৰিৱৰ্তে ২ লাখ টকাকৈ দিয়া হ'ব । এই আঁচনিসমূহৰ ৰূপায়ণত প্ৰায় ২ লাখ ৫০ হাজাৰ কোটি টকা ব্যয় কৰা হ'ব । এই কামবোৰৰ বাবে প্ৰয়োজনীয় বৃহৎ পুঁজিৰ বাবে ৫ বছৰৰ ভিতৰত সেইবোৰ সম্পূৰ্ণ কৰাৰ লক্ষ্য নিৰ্ধাৰণ কৰা হৈছে ।

"যদি বিহাৰে কেন্দ্ৰীয় চৰকাৰৰ দ্বাৰা বিশেষ মৰ্যাদা লাভ কৰে, তেন্তে আমি অতি কম সময়ৰ ভিতৰতে এই কাম সম্পূৰ্ণ কৰিম । আমি ২০১০ চনৰ পৰা বিহাৰৰ বাবে বিশেষ শ্ৰেণীৰ মৰ্যাদা দাবী কৰি আহিছোঁ । ইয়াৰ বাবে ২০১২ চনৰ ২৪ নৱেম্বৰ তাৰিখে পাটনাৰ গান্ধী ময়দানত আৰু ২০১৩ চনৰ 17 মাৰ্চত দিল্লীৰ ৰামলীলা ময়দানত বিহাৰৰ বাবে বিশেষ মৰ্যাদাৰ বাবে এক অধিকাৰ সমদল অনুষ্ঠিত কৰা হৈছিল ।" নীতিশ কুমাৰে কয় ।

আনহাতে, নীতিশ কুমাৰে কয় যে তেওঁৰ চৰকাৰৰ দাবীত তদানীন্তন কেন্দ্ৰীয় চৰকাৰে ইয়াৰ বাবে ৰঘুৰাম ৰাজন সমিতিও গঠন কৰিছিল । ইয়াৰ প্ৰতিবেদন ২০১৩ চনৰ ছেপ্টেম্বৰত প্ৰকাশিত হৈছিল । কিন্তু সেই সময়তো তদানীন্তন কেন্দ্ৰীয় চৰকাৰে এই বিষয়ত একো কৰা নাছিল । ২০১৭ চনৰ মে' মাহত কেন্দ্ৰীয় চৰকাৰলৈ বিশেষ শ্ৰেণীৰ মৰ্যাদা বিচাৰি পত্ৰ লিখাৰ কথাও তেওঁ উল্লেখ কৰে ।

বুধবাৰৰ কেবিনেট বৈঠকত কেন্দ্ৰীয় চৰকাৰক বিহাৰক বিশেষ মৰ্যাদা দিবলৈ অনুৰোধ জনোৱাৰ বাবে এক প্ৰস্তাৱ গৃহীত কৰা হৈছে । মুখ্যমন্ত্ৰী নীতিশ কুমাৰে লগতে অনুৰোধ জনায় যে বিহাৰৰ জনসাধাৰণৰ স্বাৰ্থৰ কথা মনত ৰাখি কেন্দ্ৰীয় চৰকাৰে অতি সোনকালে বিহাৰক বিশেষ মৰ্যাদা দিয়া উচিত ।

লগতে পঢ়ক :মণীষ ছিছোডিয়াৰ ন্যায়িক জিম্মা বৃদ্ধি