নেশ্যনেল ডেস্ক,১৭ আগষ্ট :জৱাহৰলাল নেহৰুৰ কৰ্মই তেওঁৰ পৰিচয় । এই মন্তব্য কংগ্ৰেছ নেতা ৰাহুল গান্ধীৰ । নেহৰু মেম'ৰিয়েল মিউজিয়াম এণ্ড লাইব্ৰেৰীৰ পৰা নেহৰুৰ নাম আঁতৰোৱা সন্দৰ্ভত কৰা এক প্ৰশ্নৰ উত্তৰত এই মন্তব্য কৰে ৰাহুল গান্ধীয়ে । ৰাহুল গান্ধীয়ে হিন্দীত কয়,'নেহৰু জী কি পেহচান উনকে কৰম হে, উনকা নাম নেহি'। অৰ্থাৎ তেওঁৰ নাম নহয় কামৰ বাবেহে জনাজাত নেহৰু ।
উল্লেখ্য যে সোমবাৰে নেহৰু মেম'ৰিয়েল মিউজিয়াম এণ্ড লাইব্ৰেৰীক আনুষ্ঠানিকভাৱে প্ৰধানমন্ত্ৰীৰ সংগ্ৰহালয় আৰু পুথিভঁৰাল চ'ছাইটী হিচাপে নামাকৰণ কৰা হৈছে । সংগ্ৰহালয়ৰ এগৰাকী জ্যেষ্ঠ বিষয়াই ঘোষণা কৰে যে ইয়াৰ নাম ১৪ আগষ্টৰ পৰা কাৰ্যকৰী হ'ব । প্ৰধানমন্ত্ৰীৰ সংগ্ৰহালয় আৰু পুথিভঁৰাল চ'ছাইটীৰ কাৰ্যবাহী পৰিষদৰ উপাধ্যক্ষ এ সূৰ্য প্ৰকাশে পূৰ্বে সামাজিক মাধ্যমৰ প্লেটফৰ্ম 'এক্স'ত এই ঘোষণা কৰিছিল ।
ইয়াৰ পূৰ্বে জুনৰ মাজভাগত নেহৰু মেম'ৰিয়েল মিউজিয়াম এণ্ড লাইব্ৰেৰী চ'ছাইটীৰ এক বিশেষ সভাত ইয়াৰ নাম সলনি কৰাৰ সিদ্ধান্ত গ্ৰহণ কৰা হৈছিল । ইফালে সংগ্ৰহালয়ৰ পুনৰ নামাকৰণকলৈ বিভিন্ন মহলত প্ৰতিক্ৰিয়াৰো সৃষ্টি হৈছে । বিশেষকৈ বিৰোধী কংগ্ৰেছে চৰকাৰৰ এই সিদ্ধান্তক তীব্ৰ ভাষাৰে সমালোচনা কৰিছে ।