নিউজ ডেস্ক, ১৭ আগষ্ট : ভাৰতীয় জনতা পাৰ্টীয়ে আগন্তুক ছত্তীশগড় বিধানসভা নিৰ্বাচন, ২০২৩-ৰ বাবে দলীয় প্ৰাৰ্থীৰ প্ৰথমখন তালিকা প্ৰকাশ কৰিছে । বিজেপিয়ে ছত্তীশগড়ৰ ২১ খন আসনৰ বাবে প্ৰাৰ্থীৰ নাম ঘোষণা কৰিছে । বুধবাৰে দিল্লীত বিজেপিৰ কেন্দ্ৰীয় নিৰ্বাচন সমিতিৰ বৈঠকত ছত্তীশগড় বিধানসভা নিৰ্বাচন, ২০২৩-ৰ বিষয়ে আলোচনা কৰা হৈছিল । বৈঠকত প্ৰধানমন্ত্ৰী নৰেন্দ্ৰ মোদী, প্ৰতিৰক্ষা মন্ত্ৰী ৰাজনাথ সিং, গৃহমন্ত্ৰী অমিত শ্বাহ আৰু কেন্দ্ৰীয় নিৰ্বাচন সমিতিৰ সদস্যসকল উপস্থিত আছিল । কেন্দ্ৰীয় নিৰ্বাচন সমিতিয়ে ছত্তীশগড় বিধানসভা নিৰ্বাচন, ২০২৩-ৰ বাবে ২১ টা নামত অনুমোদন জনাইছে ।
বিজেপিয়ে প্ৰকাশ কৰা প্ৰথমখন তালিকাত ১০ খনত অনুসূচিত জনজাতি, এখন অনুসূচিত জাতি আৰু ১০ খন আসন সাধাৰণ প্ৰাৰ্থীৰ বাবে ঘোষণা কৰা হৈছে । দলটোৱে বিজয় বাঘেলৰ ওপৰত আস্থা প্ৰকাশ কৰি হাই-প্ৰফাইল পাটন আসনৰ পৰা প্ৰাৰ্থী হিচাপে ঘোষণা কৰিছে । পাটন হৈছে মুখ্যমন্ত্ৰী ভূপেশ বাঘেলৰ বিধানসভা সমষ্টি আৰু বিজয় বাঘেল তেওঁৰ ভতিজাক । এইবাৰো যদি মুখ্যমন্ত্ৰী বাঘেলে এই সমষ্টিটোৰ পৰা নিৰ্বাচনত প্ৰতিদ্বন্দ্বিতা কৰে, তেন্তে খুৰাক আৰু ভতিজাকৰ মাজত এক আকৰ্ষণীয় যুঁজ হ'ব ।