তেলেংগানাত উত্তৰ পূৰ্বাঞ্চলৰ যুৱকক দুৰ্ব্যৱহাৰ কৰা শ্ব'পিং মলৰ সুৰক্ষা কৰ্মীক গ্ৰেপ্তাৰ

তেলেংগানাত বৈষম্যতাৰ বলি দুই মণিপুৰী যুৱক ৷ বুধবাৰে তেলেংগানাত মণিপুৰৰ দুজন যুৱকক দুৰ্ব্যৱহাৰ কৰে এখন প্ৰতিষ্ঠিত শ্ব'পিং মলৰ সুৰক্ষা কৰ্মীয়ে ৷ গোটেই ঘটনাটো ভিডিঅ' আকাৰে টুইট যোগে প্ৰকাশ পোৱাত বিষয়টো সন্দৰ্ভত ৰিটুইট কৰে কেন্দ্ৰীয় মন্ত্ৰী কিৰেণ ৰিজিজুৱে ৷ অৱশেষত দুৰ্ব্যৱহাৰ কৰা সুৰক্ষা কৰ্মী আৰু মেনেজাৰক গ্ৰেপ্তাৰ কৰে ৰাছাক'ণ্ডা আৰক্ষীয়ে ৷

নিউজ ডেস্ক,9 এপ্ৰিলঃ বহিঃৰাজ্যত নিজকে ভাৰতীয় বুলি বাৰে বাৰে প্ৰমাণ দিব লগা হয় উত্তৰ পূৰ্বাঞ্চলৰ মানুহে ৷ বাৰে বাৰে বৈষম্যতাৰ বলি হয় উত্তৰ পূৰ্বাঞ্চলৰ যুৱক-যুৱতী ৷

দিল্লীত উত্তৰ-পূবৰ এগৰাকী যুৱতীৰ গাত পিক পেলাই যুৱতী গৰাকীক কৰ'ণা আখ্যা দিয়াৰ দৰে ঘটনাৰ কিছুদিন পিছতেই তেলেংগানাত পুনৰ সংঘটিত হ'ল বৈষম্যৰ ঘটনা ৷ তেলেংগানাৰ এখন প্ৰতিষ্ঠিত শ্ব'পিং মলত সংঘটিত হয় এই বৈষম্যৰ ঘটনা ৷ শ্ব'পিং মলৰ সুৰক্ষা কৰ্মীয়ে উত্তৰ পূৰ্বাঞ্চলৰ তথা মণিপুৰৰ দুজন যুৱকক অনা ভাৰতীয় দোহাই দি সোমাবলৈ দিয়া নাছিল শ্ব'পিং মলৰ ভিতৰত ৷ যুৱক দুজনে আধাৰ কাৰ্ড দেখুওৱাৰ পিছতো ভাৰতীয় বুলি বিশ্বাস নকৰিলে শ্ব'পিং মলখনৰ সুৰক্ষা কৰ্মীয়ে ৷ খাদ্য সামগ্ৰী ক্ৰয় কৰিবলৈ যোৱা দুই যুৱকক খালী হাতে উভতাই পঠালে তেলেংগানাৰ ভনস্থলীপুৰমৰ প্ৰতিষ্ঠিত শ্ব'পিং মলখনৰ সুৰক্ষা কৰ্মীয়ে ৷

ঘটনাটো ঘটি থকা অৱস্থাতে এগৰাকীয়ে ভিডিঅ' কৰে সমগ্ৰ ঘটনাৰ ৷ পিছত ভিডিঅ'টো টুইট যোগে প্ৰকাশ কৰাত কেন্দ্ৰীয় মন্ত্ৰী কিৰেণ ৰিজিজুৱে এই সন্দৰ্ভত ৰিটুইট কৰি বিষয়টো গুৰুত্ব সহকাৰে লয় ৷ অৱশেষত বৃহস্পতিবাৰে এজাহাৰৰ ভিত্তিত শ্ব'পিং মলখনৰ সুৰক্ষা কৰ্মী আৰু মেনেজাৰ জনক গ্ৰেপ্তাৰ কৰে ৰাছাক'ণ্ডা আৰক্ষীয়ে ৷

লগতে পঢ়কঃলক ডাউনঃ এইবাৰ ৰঙালীয়ে ৰং সানিব নোৱাৰে শিল্পীৰ জীৱনত