নেশ্বনেল ডেস্ক, 15 অক্টোবৰ : প্ৰাক্তন ৰাষ্ট্ৰপতি এ.পি.জে. আব্দুল কালামৰ 88 সংখ্যক জন্ম বাৰ্ষিকী উপলক্ষ্যে মঙলবাৰে শ্ৰদ্ধাঞ্জলী জ্ঞাপন কৰে প্ৰধানমন্ত্ৰী নৰেন্দ্ৰ মোডীয়ে ৷ দেশৰ উন্নয়নত তেওঁৰ অৱদানকো শ্ৰদ্ধাৰে সোঁৱৰে প্ৰধানমন্ত্ৰীগৰাকীয়ে ৷ টুইটাৰৰ জৰিয়তে প্ৰধানমন্ত্ৰী মোডীয়ে কয়, "কালামজীৰ জন্ম বাৰ্ষিকীত হিয়াভৰা শ্ৰদ্ধা জ্ঞাপন কৰিলো ৷ তেওঁ 21 শতিকাৰ ভাৰতৰ সপোন দেখাৰ লগতে দেশলৈ অসাধাৰণ অৱদান আগবঢ়াইছিল ৷ তেওঁৰ জীৱন তথা আদৰ্শই দেশৰ প্ৰতিজন লোককে প্ৰেৰণা যোগাই আহিছে ৷ আব্দুল কালামৰ জন্ম জয়ন্তীত তেওঁক অভিবাদন জ্ঞাপন কৰিছো ৷"
দেশৰ প্ৰতিৰক্ষা মন্ত্ৰী ৰাজনাথ সিঙেও প্ৰাক্তন ৰাষ্ট্ৰপতিগৰাকীক শ্ৰদ্ধাৰে সোঁৱৰাৰ লগতে কয় যে, আব্দুল কালাম দেশৰ প্ৰতিজন লোকৰে হৃদয় আৰু মগজুত বৰ্তমানেও বাস কৰিছে ৷