নেশ্যনেল ডেস্ক, 15 মাৰ্চ : কৰ'ণাভাইৰাছৰ বিৰুদ্ধে যুঁজিবৰ বাবে যুটীয়া ৰণনীতি তৈয়াৰ কৰাৰ উদ্দেশ্যে ছাৰ্কৰ সদস্য দেশসমূহৰ সৈতে ভিডিঅ' কনফাৰেন্স কৰে প্ৰধানমন্ত্ৰী নৰেন্দ্ৰ মোডীয়ে ৷ এই কনফাৰেন্সিঙত মোডীৰ সৈতে অংশগ্ৰহণ কৰে শ্ৰীলংকাৰ ৰাষ্ট্ৰপতি গোটাবায়া ৰাজাপাকছা, মালদ্বীপৰ ৰাষ্ট্ৰপতি ইব্ৰাহিম চোলিহ, নেপালৰ প্ৰধানমন্ত্ৰী কে. পি. শৰ্মা অলি, ভূটানৰ মুৰব্বী লোটায় শ্বেৰিং, বাংলাদেশৰ প্ৰধানমন্ত্ৰী ছেইখ হাছিনা, আফগানিস্তানৰ ৰাষ্ট্ৰপতি আশ্ৰাফ ঘানি আৰু পাকিস্তানৰ প্ৰধানমন্ত্ৰীৰ বিশেষ সহায়ক জাফৰ মিৰ্জা ৷
উল্লেখ্য যে, সমগ্ৰ বিশ্বতে বৰ্তমানলৈকে কৰ'ণাভাইৰাছৰ ফলত 5,000 তকৈ অধিক লোকৰ মৃত্যু হৈছে ৷
ভিডিঅ' কনফাৰেন্সিঙত প্ৰধানমন্ত্ৰী মোডীয়ে কয় যে, দক্ষিণ এছিয়াৰ দেশসমূহত বৰ্তমানলৈকে 150 তকৈও কম ঘটনা পোহৰলৈ আহিছে যদিও আমি সতৰ্ক হৈ থকা উচিত ৷ তেওঁ কয়, "কৰ'ণাৰ বিৰুদ্ধে যুঁজিবৰ বাবে 'সাজু হৈ থাকক কিন্তু চিন্তিত নহ'ব' হৈছে ভাৰতৰ মন্ত্ৰ৷"
মোডীয়ে কয়, "আমি জানুৱাৰীৰ মাজভাগৰ পৰাই ভাৰতত প্ৰৱেশ কৰা লোকৰ স্ক্ৰীনিং কৰা আৰম্ভ কৰিছো ৷ ইয়াৰোপৰি, ভ্ৰমণৰ ক্ষেত্ৰত প্ৰতিবন্ধকতা আৰোপ কৰিছো ৷"