কোনোবাই যদি ভাৰতীয় মানচিত্ৰখন অংকন কৰে তেতিয়া উত্তৰ-পূৱৰ চীন সীমান্তৰে অৰুণাচল প্ৰদেশৰ অংশখিনিক দুটা ডাঙৰ মাছৰ ফিছা সদৃশ আকৃতিৰে অংকন কৰা হয় ৷ কিন্তু লোকসভাত পূৱ অৰুণাচলৰ এজন সাংসদে এই ভাৰতীয় মানচিত্ৰ ভুল ধৰণে অংকন কৰা হৈছে বুলি উল্লেখ কৰে ৷ তেওঁ কয় যে মাছৰ ফিছা সদৃশ অঞ্চলখিনি প্ৰকৃততে মেকমোহন লাইনৰ ভিতৰত পৰে আৰু এই অংকিত অঞ্চলখিনি ভাৰতীয় সীমাৰ বাহিৰত পৰে ৷ এইটো সম্পূৰ্ণৰূপে ভাৰতৰ ভুল বুলি তেওঁ মন্তব্য কৰে ৷
এই ক্ষেত্ৰত আমোদজনক ঘটনা এইটো যে ভাৰতীয় সেনা আৰু ইণ্ডো-তিব্বেটান বৰ্ডাৰ পুলিছ (ITBP)ৰ জোৱান তথা বৰ্ডাৰ আউট পোষ্ট (BOP) দুটা ভাগত বিভক্ত হৈ ভাৰতীয় মানচিত্ৰ অনুসৰি মেকমোহন লাইনৰ ভিতৰত নিৰাপত্তাৰক্ষী হিচাপে নিয়োগ হৈ আছে যদিও ই প্ৰকৃততে চীনৰ হাডিগ্ৰা,ডাখৰু পাছ,গালাই পাছ আৰু টাটু পাছ অঞ্চলহে ৷
বৃটিছে ভাৰত আৰু চীনা সীমান্তক মেকমোহন লাইন হিচাপে ভাগ কৰি গৈছিল ৷ বৃটিছ ইণ্ডিয়াৰ বৈদেশিক সচিব আৰ্থাৰ হেনৰী মেকমোহনৰ (1911-1914) নামেৰে এই সীমা নিৰ্ধাৰণ কৰা হৈছিল ৷ পাহৰ আৰু জলপথক সূচাই এই সীমাৰ নিৰ্ধাৰণ কৰা হৈছিল ৷ পৰৱৰ্তী সময়ত তিনিবাৰৰ পাৰস্পৰিক বুজাবুজিৰে এছিয়াৰ এই দুই মহাশক্তিয়ে নিজৰ সীমাক মেকমোহন লাইনৰ জৰিয়তে নিৰ্ধাৰণ কৰে ৷
এই সময়খিনি ভাৰতীয় মানচিত্ৰখন পুনৰ অংকনৰ বাবে উপযুক্ত সময় বুলি উল্লেখ কৰে বিজেপি সাংসদ তাপিৰ গাৱই ৷ তেওঁ অৰুণাচল প্ৰদেশৰ দিবাং উপত্যকা জিলা আৰু অনজাও জিলাৰ বিবাদিত অংশক সমাধা কৰি মেপখন পুনৰ অংকনৰ বাবে উল্লেখ কৰে ৷ বুধবাৰে সংসদ এই কথা উত্থাপন কৰে সাংসদগৰাকীয়ে ৷ তেওঁ লগতে কয় যে চীনে ইতিমধ্যেই এই দুই অংশ চীনৰ বুলি দাবী উত্থাপন কৰি আহিছে লগতে চীনৰ মেপতো ই স্পষ্টকৈ অংকন কৰা হৈছে ইয়াৰোপৰি ভাৰতৰ মানচিত্ৰতো এই কথা স্পষ্ট ৰূপত আছে ৷