পুৱা 11 বজাৰ দহটা শীৰ্ষ বাতৰি

পুৱা 11 বজাৰ দহটা শীৰ্ষ বাতৰি...

SI কাণ্ডৰ সৈতে জড়িত থকাৰ অভিযোগত পুনৰ নলবাৰীৰ পৰা আটক এজনক ৷ আটকাধীন কমল হাজৰিকা মন্ত্ৰী চন্দ্ৰমোহন পাটোৱাৰীৰ অতি ঘনিষ্ঠ ৷

তেলেংগানাৰ মুখ্য সচিব সোমেশ কুমাৰে সকলো জিলা কালেক্টৰ, আৰক্ষী আয়ুক্ত, আৰক্ষী অধীক্ষক আৰু সকলো জিলা প্ৰশাসনকে সজাগ হৈ থাকিবলৈ সতৰ্ক কৰি দিছে ৷ প্ৰচুৰ বৃষ্টিপাতৰ ফলত বানৰ কৱলত পৰিছে তেলেংগানা ৷

লক ডাউনৰ সুযোগ লৈ মিজোৰামৰ মামিট জিলাৰ সীমান্তৱৰ্তী মিজো লোক সকলে ৰাতাবাৰী সমষ্টিৰ বৰভুবি এলেকাত সিংলা সংৰক্ষিত বনাঞ্চলত অসমৰ মাটি দখল কৰি জুম খেতি কৰাৰ লগতে পুখুৰী খান্দিছিল, আনকি অসমৰ মাটিত ঘৰ পৰ্যন্ত নিৰ্মাণ কৰিছিল ।

সোমবাৰে ঘোষণা কৰা ফলাফল অনুসৰি চেকচন এচিষ্টেণ্ট পদৰ বাবে সংৰক্ষিত প্ৰতিবন্ধী সকলৰ আসন সমূহ নিৰ্দিষ্টকৈ প্ৰকাশ নকৰাত ক্ষুব্ধ হৈ পৰিছে প্ৰতিবন্ধী সমাজ ৷ তেওঁলোকৰ অভিযোগ ৰাজ্য চৰকাৰে প্ৰতিবাৰে প্ৰতিবন্ধী লোকসকলক তেওঁলোকৰ ন্যায্য প্ৰাপ্যৰ পৰা বঞ্চিত কৰি ৰাখিছে ৷

ভাৰতীয় টেকটোনিক প্লেটৰ গতিবিধি পর্যবেক্ষণ কৰাৰ লগতে ভূমিকম্প সম্ভাৱনীয়তা থকা মণ্ডল সমূহ চিনাক্ত কৰি চাপৰ মানচিত্ৰ (strain map) তৈয়াৰ কৰিছে ভাৰতীয় ভূতত্ব জৰীপ বিভাগে ।

শাৰদীয় দুৰ্গোৎসৱৰ প্ৰাকক্ষণত আইন-শৃংখলা তথা ক'ভিড পৰিস্থিতি পৰ্যালোচনা মুখ্যমন্ত্ৰীৰ ৷ আধাৰ পঞ্জীয়নৰ কাম-কাজৰ অগ্ৰগতিৰো পৰ্যালোচনা কৰে মুখ্যমন্ত্ৰী সোণোৱালে ৷

ডিচেম্বৰ মাহত অনুষ্ঠিত হ’ব বিটিচিৰ নিৰ্বাচন । বিজেপিৰ নেতৃত্বতে বিটিচিৰ চৰকাৰ গঠন হ’ব বুলি মন্তব্য হিমন্ত বিশ্ব ।

মঙলবাৰে ভাৰত-চীন সীমান্তৰ সূচিলত ভাৰতীয় সেনা বাহিনী আৰু চীনৰ পি.এল.এৰ সৈতে সপ্তম পৰ্যায়ৰ বৈঠকখন সুচাৰুৰূপে সম্পন্ন হয় ৷

উত্তৰ অসমবাসীৰ প্ৰতীক্ষাৰ অৱসান । ইতিহাস সৃষ্টি কৰি পোন প্ৰথমবাৰৰ বাবে চলিল ৰাজধানী এক্সপ্ৰেছ ।

নগাঁও জিলাৰ কঠাগুৰিত অৱস্থিত নীলা পানীৰ হ্ৰদলৈ দেওবাৰে বন্ধুসহ প্ৰাকৃতিক সৌন্দৰ্য উপভোগ কৰিবলৈ আহিছিল গুৱাহাটীৰ বামুনীমৈদামৰ বিকি কলিতা । হ্ৰদৰ পানীত নমাৰ পৰতেই সন্ধানহীন হৈ পৰে যুৱকজন ৷ SDRF বাহিনীয়ে ইতিমধ্যে তিনিদিন ধৰি অভিযান চলাই ভাগৰি পৰিছে, তথাপিও সন্ধান লাভ কৰা নাই বিকি কলিতাৰ ।