নিউজ ডেস্ক,১৩ অক্টোবৰ: হৰি নামৰ ধ্বনিৰে গুঞ্জৰিত সমগ্ৰ অসম । মহাপুৰুষ শ্ৰীমন্ত শংকৰদেৱ গুৰুজনাৰ ৫৭৬ সংখ্যক জন্মোৎসৱক লৈ নলবাৰীতো পুৱাৰে পৰা শুনা গৈছে হৰি নামৰ ধ্বনি । নলবাৰীৰ মৰোৱা শংকৰদেৱ ক্ষেত্ৰত গুৰুজনাৰ ৫৭৬ সংখ্যক জন্মোৎসৱক লৈ শংকৰদেৱ নামঘৰ প্ৰাংগনত ভকতৰ হৰি নাম । পুৱা ভাগৱত স্থাপন, গুৰু কীৰ্তনৰ পিছত এক বৰ্ণাঢ্য সাংস্কৃতিক শোভাযাত্ৰা উলিওৱা হয় । অঞ্চলটোৰ শতাধিক আই বাপ ভকতে এই শোভাত্ৰাত অংশগ্ৰহণ কৰি সমগ্ৰ মৰোৱা অঞ্চল ভ্ৰমণ কৰে ।
প্ৰতিজন বাপ ভকতে গুৰুজনাৰ আসনত সেৱা প্ৰণিপাত জনাই এই শোভাত্ৰাত অংশগ্ৰহণ কৰা দেখা যায় । উল্লেখযোগ্য যে ৫৭৬ সংখ্যক গুৰুজনাৰ জন্মোৎসৱ মৰোৱাত ৭২ সংখ্যক বৰ্ষত এইবাৰ উদযাপন কৰা হৈছে । পাঁচ দিনীয়া ভিন্ন কাৰ্যসূচীৰে অনুষ্ঠিত হয় গুৰুজনাৰ জন্মোৎসৱ । জন্মজয়ন্তী উপলক্ষে উলিওৱা শোভাযাত্ৰা মৰোৱা শংকৰদেৱ নামঘৰত সমাপ্ত কৰি পৰৱৰ্তী কাৰ্যসূচী সমূহো চলাই নিয়ে উদ্যোক্তাসকলে । দেওবাৰৰ পৰা উদযাপিত গুৰুজনাৰ জন্মোৎসৱ অহা ১৭ অক্টোবৰত সামৰণি পৰিব ।
সমান্তৰালভাৱে মহাপুৰুষ শ্ৰীমন্ত শংকৰদেৱৰ ৫৭৬ সংখ্যক জন্ম মহোৎসৱত হৰি নামেৰে মুখৰিত হ’ল ৰঙিয়া । ৰঙিয়া চেনীমাৰা, বিহাপাৰাত শ্ৰীশ্ৰী বংশীগোপাল সত্ৰৰ উদ্যোগত অনুষ্ঠিত হোৱা গুৰুজনাৰ জন্ম মহোৎসৱত দেওবাৰে উলিওৱা হয় বিশাল ভাগৱত শোভাযাত্ৰা । অঞ্চলটোৰ পাঁচ শতাধিক ভক্তপ্ৰাণ ৰাইজ তথা বিহাপাৰা মধ্যচুপা নামঘৰৰ অংশগ্ৰহণৰে অঞ্চলটোত উলিওৱা শোভাযাত্ৰাত সহস্ৰাধিক ভক্তপ্ৰাণ ৰাইজে ভাগৱত যাত্ৰাৰ আশিস গ্ৰহণ কৰে ।