লখিমপুৰ :উচ্চশিক্ষা গ্ৰহণ কৰি বিদেশত গৈ এটা চাকৰি কৰাৰ বাবে বহুতৰ হাবিয়াস থাকে । কিন্তু বিভিন্ন কাৰণত ভবা মতে নহয় গৈ । খুউব কম সংখ্যককহে এনে সৌভাগ্যই লগ দিয়ে । পিছে এইবাৰ ওলাইছে এক সুবৰ্ণ সুযোগ । জাপানত চাকৰি কৰাৰ বাবে এক সুযোগ সৃষ্টি হৈছে । জাপানৰ বিভিন্ন ক্ষেত্ৰত নিয়োগৰ এক সুযোগ সৃষ্টি হৈছে । তাৰ বাবে কিন্তু প্ৰথমে শিকি ল’ব লাগিব জাপানী ভাষা । তাৰো ব্যৱস্থা কৰা হৈছে ।
মিৰাই (MIRAI) জাপানীজ লাৰ্ণিং চেন্টাৰে তাৰ ব্যৱস্থা কৰিছে ৷ বিভিন্ন মহাবিদ্যালয়ৰ সৈতে চুক্তিবদ্ধ হৈ এবছৰীয়া জাপানী ভাষা শিক্ষণ কাৰ্যক্ৰম আৰম্ভ কৰিছে ৷ এবছৰীয়া জাপানী ভাষাৰ পাঠ্যক্ৰম সফলতাৰে উত্তীৰ্ণ হোৱা সকলক জাপানী বিভিন্ন কোম্পানীৰ সৈতে নিয়োগৰ ব্যৱস্থা, পাৰপত্ৰ, ভিছা আদিৰ সকলো ব্যৱস্থা কৰি দিব মিৰাই-জাপানীজ লাৰ্ণিং চেন্টাৰে ।
ৰাজ্যত ২০১৭ চনৰ পৰা জাপানী ভাষাৰ শিক্ষাদান আৰম্ভ কৰা এই কেন্দ্ৰই ইতিমধ্যে ৰাজ্যৰ পাঁচখন মহাবিদ্যালয়ৰ সৈতে চুক্তিবদ্ধ হৈ জাপানী ভাষা শিক্ষাৰ ব্যৱস্থা কৰিছে । শেহতীয়াকৈ মঙলবাৰে লখিমপুৰ বাণিজ্য মহাবিদ্যালয়ৰ সৈতে চুক্তিবদ্ধ হয় ।