নলবাৰী,১৯ জুন: বাৰিষাৰ প্ৰথমটো বানৰ কবলত নলবাৰী জিলাৰ পশ্চিম প্ৰান্ত । জিলাখনৰ পশ্চিম নলবাৰী আৰু টিহু ৰাজহ চক্ৰৰ বিস্তীৰ্ণ অঞ্চল এতিয়া পানীৰ তলত । বুঢ়াদিয়া নৈৰ বাঢ়নী পানীয়ে পশ্চিম নলবাৰী বুৰাই পেলোৱাৰ পিচত বুধবাৰে পুনৰ জিলাখনৰ টিহুৰ দক্ষিণ ভোজকুছিত ছিগিল বুঢ়াদিয়া নৈৰ মথাউৰি ।
যাৰ ফলত জিলাখনৰ বুঢ়াদিয়া নৈৰ দুয়ো পাৰৰ কেইবাখনো গাঁও প্লাৱিত হৈ পৰে । দুয়ো পাৰৰ প্ৰায় শ শ পৰিয়াল এতিয়া বানৰ কবলত । ৰাইজৰ মাজত সৃষ্টি হৈছে এক হাহাকাৰময় পৰস্থিতি । উল্লেখযোগ্য যে দক্ষিণ ভোজকুছিৰে মথাউৰি ছিগাত ভোজকুছি, দক্ষিণ ভোজকুছি, শাক্তিপাৰা, বালাবড়ী, ঘোপা আদি গাঁৱৰ লগতে টিহু বিধানসভা সমষ্টিৰ অন্তৰ্গত পশ্চিম নলবাৰীৰ লখোপুৰকে আদি কৰি সমগ্ৰ উত্তৰ অঞ্চলো প্লাৱিত হয় ।
জানিব পৰা মতে মঙলবাৰে নিশাৰে পৰা বুঢ়াদিয়া নৈৰ কেইবাটাও স্থানত মথাউৰিৰ ওপৰেৰে পানী বাগৰি আছিল । জিলা প্ৰশাসনৰ লোকেও কিছু স্থান পৰিদৰ্শন কৰি বুজ লৈছিল মথাউৰিকে ধৰি বাঢ়নী পানীয়ে বুৰোৱা অঞ্চলৰ । তাৰ পিচতে মঙলবাৰৰ নিশাৰে পৰা বুধবাৰৰ পুৱাৰ ভাগলৈ অব্যাহত থকা মূষলধাৰ বৰষুণৰ ফলত বুঢ়াদিয়া নৈৰ জলপৃষ্ঠ আৰু অধিক বৃদ্ধি পায় । যাৰ ফলত বুধবাৰে দক্ষিণ ভোজকুছিত মথাউৰি ছিগে বুলি জানিবলৈ দিয়ে ৰাইজে ।
ইফালে দক্ষিণ ভোজকুছিত মথাউৰি ছিগাত এতিয়া প্ৰায় ছয়, সাতখন গাঁৱৰ কৃষিভূমিকে ধৰি বহু লোকৰ বাসগৃহও পানীত প্লাৱিত হয় । আনহাতে এনে পৰিস্থিতিতো বৰ্তমান সময়লৈকে লখোপুৰ কিম্বা ভোজকুছিত ছিগা মথাউৰি পৰিদৰ্শন অন্যথা বান পৰিস্থিতিৰ বুজ ল'বলৈ প্ৰশাসনৰ কোনো লোক উপস্থিত নোহোৱাৰ অভিযোগ ৰাইজৰ । শীঘ্ৰে প্ৰশাসনৰ কোনো লোক উপস্থিত হৈ বানাক্ৰান্তলৈ সহায়ৰ হাত আগবঢ়াবলৈ অনুৰোধ জনাই ভুক্তভোগী লোকসকলে ।