গুৱাহাটী, ১৭ মে’: দৰঙৰ ছিপাঝাৰৰ বামুণঝাৰত প্ৰতিফলিত হ’ল জাত-পাতৰ অৱক্ষয়ী মানসিকতা ৷ সেই মানসিকতাৰ ফলত আন সম্প্ৰদায়ৰ ৰাইজৰ লগত বিহু উদযাপন কৰাৰ বাবে ২০ টা পৰিয়ালক এঘৰীয়া কৰা আৰু ১০ হাজাৰ টকাৰ জৰিমনা বিহাৰ ঘটনাই জোকাৰি গৈছে ৰাজ্য ৷ সমগ্ৰ ৰাজ্যবাসীয়ে নিন্দনীয় ঘটনাটোক গৰিহণা দিয়াৰ পিচত অঞ্চলটোৰ ৰাইজে কৰিছে ভুলৰ শুধৰণি ।
ছিপাঝাৰৰ বামুণঝাৰত বিহুত অংশগ্ৰহণ কৰি এঘৰীয়া হ’বলগীয়া হোৱা দুৰ্ভাগ্যজনক ঘটনাৰ বুজ ল'বলৈ উক্ত স্থানত উপস্থিত হয় স্থানীয় ৰাজহ চক্ৰ বিষয়াৰ লগতে কোচ-ৰাজবংশী উন্নয়ন পৰিষদৰ অধ্যক্ষ প্ৰণৱ নাৰায়ণ দেৱ ৷ জাত-পাতৰ এলান্ধুকলীয়া দীঘলীয়া সংঘাতৰ ফলশ্ৰুতিত জাতি-ধৰ্ম-বৰ্ণৰ উৰ্ধত সকলো মিলি উদযাপন কৰা বিহুত ভাগ লোৱাৰ বাবে এবছৰলৈ এঘৰীয়া কৰা হৈছিল বামুণঝাৰৰ ২০ টা পৰিয়ালক ৷ তদুপৰি জৰিমনা বিহা হৈছিল ১০ হাজাৰ টকাকৈ ।
উক্ত বিষয়টোক লৈ বাতৰি প্ৰচাৰ হোৱাৰ লগতে ৰাজ্যজুৰি ব্যাপক গৰিহণাৰ সন্মুখীন হোৱাৰ পিচতে তৎপৰ হৈ পৰে স্থানীয় প্ৰশাসন আৰু একাংশ সমাজ সচেতন লোক ৷ বৃহস্পতিবাৰে আবেলি বামুণঝাৰ নাথ-যোগী হৰি মন্দিৰৰ সন্মুখত দুয়ো পক্ষকে আহ্বান কৰি পূৰ্বৰ দৰে মিলি-জুলি থাকিবলৈ পৰামৰ্শ প্ৰদান কৰে পাঠৰিঘাট ৰাজহ চক্ৰ বিষয়াগৰাকীৰ লগতে কোচ-ৰাজবংশী উন্নয়ন পৰিষদৰ অধ্যক্ষ প্ৰণৱ নাৰায়ণ দেৱে ।