ডিব্ৰুগড়, ৪ ছেপ্টেম্বৰ : মাত্ৰ ২২ বছৰ বয়সতে অনলাইন ট্ৰেডিঙৰ জৰিয়তে কোটিপতি হোৱা ডিব্ৰুগড়ৰ বিশাল ফুকনৰ প্ৰৱঞ্চনাৰ কাহিনী পোহৰলৈ অহাৰ পাচতেই ৰাজ্যজুৰি হাহাকাৰ লাগি পৰিছে । আনহাতে, এই ক্ষেত্ৰত মুখ্যমন্ত্রীৰ নিৰ্দেশৰ পাচতে ডিব্ৰুগড় আৰক্ষীয়ে মাৰাথন জেৰা চলায় বিশাল ফুকনক ।
বিশাল ফুকনক আদালতত হাজিৰ ডিব্ৰুগড় আৰক্ষীৰ (ETV Bharat Assam)
ইফালে অনলাইন ট্ৰেডিঙৰ জৰিয়তে বিশাল সম্পত্তি গঢ়া বিশাল ফুকনক বুধবাৰে ডিব্ৰুগড়ৰ সত্ৰ ন্যায়াধীশ আদালতত হাজিৰ কৰোৱাৰ উদ্দেশ্যে ডিব্ৰুগড় সদৰ আৰক্ষী থানাৰ পৰা লৈ যোৱা হৈছে । আদালতত হাজিৰ কৰা পিচতেই আৰক্ষীয়ে প্ৰৱঞ্চনাৰ কাহিনীৰ অধিক তথ্য লাভৰ বাবে বিশাল ফুকনক নিজৰ জিম্মাত ল'বৰ বাবে আবেদন কৰিব ।
কিয়নো এইগৰাকী বিশাল ফুকনে অনলাইন ট্ৰেডিঙৰ নামত বিভিন্নজনৰ পৰা কোটি কোটি টকা সংগ্ৰহ কৰিছিল । ইতিমধ্যে বিশাল ফুকনৰ অনলাইন ট্ৰেডিঙৰ প্ৰৱঞ্চনাত নাম সাঙোৰ খাইছে অভিনেত্ৰী চুমী বৰাৰ । বৰ্তমান পলাতক হৈ আছে চুমী বৰা । আৰক্ষীৰ মতে, বিশাল ফুকনৰ অনলাইন ট্ৰেডিঙৰ প্ৰৱঞ্চনাৰ ঘটনাৰ লগত আৰু বহু লোক জড়িত আছে ।
বুধবাৰে আদালতত হাজিৰ কৰোৱাৰ পাচতে আৰক্ষীয়ে পুনৰ বিশাল ফুকনক জেৰা চলাব । ইয়াৰ পিচতে অনলাইন ট্ৰেডিঙৰ এই বিষয়টোৰ লগত জড়িত অধিক ব্যক্তি আৰক্ষীৰ জালত পৰাৰ সম্ভাৱনা আছে ।
উল্লেখ্য যে ডিব্ৰুগড়ৰ প্ৰৱাঞ্জলী এপাৰ্টমেণ্টৰ পৰা সোমবাৰে নিশা ডিব্ৰুগড় সদৰ থানা আৰক্ষীয়ে বিশাল ফুকনক আটক কৰিছিল । কিন্তু সেই সময়ৰে পৰাই পলাতক হৈ আছে অভিনেত্ৰী চুমী বৰা । অৱশ্যে চুমী বৰাক বিচাৰি বিভিন্ন ঠাইত আৰক্ষীয়ে অভিযান চলাইছে যদিও আৰক্ষীয়ে আটক কৰিবলৈ সক্ষম হোৱা নাই ।
