গুৱাহাটী,২৯ ফেব্ৰুৱাৰী:কেন্দ্ৰীয় চৰকাৰে নাগৰিকত্ব সংশোধনী আইন চমুকৈ 'কা' বলৱৎ কৰাৰ বাবে সাজু হোৱাৰ সময়তে ৰাজ্যত পুনৰ আন্দোলনৰ পৰিৱেশে গা কৰি উঠিছে । বিভিন্ন দল-সংগঠনে আন্দোলনৰ হুংকাৰ দিছে । ইফালে কংগ্ৰেছৰ নেতৃত্বত ১৬টা বিৰোধী ৰাজনৈতিক দলৰে গঠিত বিৰোধী ঐক্য মঞ্চই 'কা' বলৱৎ হোৱাৰ পিছদিনাই অসম বন্ধকে ধৰি সচিবালয় ঘেৰাৰ উপৰি বহু কেইটা কাৰ্যসূচী ৰূপায়ণৰ সিদ্ধান্ত গ্ৰহণ কৰিছে ।
বুধবাৰে বিৰোধী ঐক্য মঞ্চৰ গুৱাহাটীত হোৱা বৈঠকৰ পাছতে 'কা' বিৰোধী আন্দোলনৰ ঘোষণা কৰা হয় । বিৰোধী ঐক্য মঞ্চই অসম বন্ধৰ দৰে কাৰ্যসূচী গ্ৰহণৰ পাছতে বৃহস্পতিবাৰে অসম আৰক্ষীৰ সঞ্চালক প্ৰধান জি পি সিঙে বিশেষ সতৰ্কবাণী শুনায় । সামাজিক মাধ্যম যোগে আৰক্ষী সঞ্চালক প্ৰধানগৰাকীয়ে এক প্ৰকাৰৰ সকিয়নী প্ৰদান কৰে ।
সামাজিক মাধ্যম যোগে তেওঁ কয় যে অসম বন্ধৰ আহ্বান কৰিলে ভৰিব লাগিব ১৬৪৩ কোটি টকাৰ ক্ষতিপূৰণ । তেওঁ বন্ধৰ আহ্বান দিয়া সন্দৰ্ভত গুৱাহাটী উচ্চ ন্যায়ালয়ে দিয়া এক ৰায়দানৰ প্ৰসংগৰে ২০২২ চনৰ ১৯ জুনত কৰা এটা টুইটৰ প্ৰসংগৰে আজিৰ টুইটতো কৰে । টুইটাৰত তেওঁ কয় যে WP(C) 7570/2013ৰ আধাৰত গুৱাহাটী উচ্চ ন্যায়ালয়ে ২০১৯ চনৰ ১৯ মাৰ্চত দিয়া নিৰ্দেশ অনুসৰি বন্ধ আহ্বান আৰু বন্ধ আহ্বান কৰাসকলৰ দায়িত্ব আৰু জবাবদিহিতা সম্পৰ্কে ২০২২ চনৰ জুন মাহৰ মোৰ পোষ্টটোৰ পুনৰাবৃত্তি কৰিলো ।