পঞ্চম আৰু অষ্টম শ্ৰেণীৰ শিক্ষাৰ্থীকো প্ৰদান কৰা হ'ব আনন্দৰাম বৰুৱা বঁটা: ডাঃ ৰণোজ পেগু - Anandaram Baruah award

Shiksha setu App : শিক্ষা সেতু এপ সন্দৰ্ভত শিক্ষামন্ত্ৰী ডাঃ ৰণোজ পেগুৰ নতুন ঘোষণা । শিক্ষা সেতু এপকলৈ দেখা দিয়া অভাৱ-অভিযোগৰ লগতে সকলো দিশ নিৰীক্ষণ কৰাৰ বাবে তিনিজনীয়া সমিতি গঠন । ইয়াৰ লগতে আনন্দৰাম বৰুৱা বঁটা কেৱল দশম শ্ৰেণী উত্তীৰ্ণ শিক্ষাৰ্থীৰ বাবেই নহয়, এতিয়াৰে পৰা পঞ্চম আৰু অষ্টম শ্ৰেণীৰ কৰ্তী শিক্ষাৰ্থীকো প্ৰদান কৰা হ'ব বুলি ঘোষণা শিক্ষামন্ত্ৰী ডাঃ ৰণোজ পেগুৰ ।

গুৱাহাটী, ২২ জুলাই :ৰাজ্যৰ শিক্ষা বিভাগে প্ৰবৰ্তন কৰা শিক্ষা সেতু এপ সন্দৰ্ভত বহু সময়ত বিভিন্নজনে বহু অভাৱ-অভিযোগ কৰা পৰিলক্ষিত হৈ আহিছে ৷ শিক্ষা সেতু এপকলৈ দেখা দিয়া বিভিন্ন অভাৱ-অভিযোগ সন্দৰ্ভত সকলো দিশ নিৰীক্ষণ কৰাৰ বাবে এখন সমিতি গঠন কৰা হৈছে ।

শিক্ষা সেতু এপৰ ক্ষেত্ৰত শিক্ষক, অভিভাৱক আৰু নাগৰিকসকলে তেওঁলোকৰ সমস্যা, অভিযোগ আৰু পৰামৰ্শ নৱগঠিত এই তিনিজনীয়া সমিতিৰ ওচৰত দাখিল কৰিব পাৰিব । এই সমিতিখনে দেওবাৰে পৰা কাম আৰম্ভ কৰিছে । এই কথা সদৰী কৰিছে শিক্ষামন্ত্ৰী ডাঃ ৰণোজ পেগুৱে ।

গুৱাহাটীৰ এক অনুষ্ঠানত সাংবাদিকে সোধা প্ৰশ্নৰ উত্তৰত শিক্ষামন্ত্ৰী ডাঃ পেগুৱে কয় যে এই সন্দৰ্ভত পেপাৰত বিজ্ঞাপন দিয়া হৈছে আৰু এটা কিউ আৰ কোড দিয়া হৈছে । ৱেবছাইট নাইবা কিউ আৰ কোড স্কেন কৰি নাইবা ই-মেইলৰ জৰিয়তে অভিযোগ দাখিল কৰিব পাৰিব ।

আনহাতে, আনন্দৰাম বৰুৱা বঁটা সন্দৰ্ভত শিক্ষামন্ত্ৰীগৰাকীয়ে কয় যে শীঘ্ৰে সম্প্ৰসাৰিত হ’ব আনন্দৰাম বৰুৱা বঁটা । আনন্দৰাম বৰুৱা বঁটাক লৈ নতুন চিন্তা শিক্ষা বিভাগৰ । আনন্দৰাম বৰুৱা বঁটা কেৱল দশম শ্ৰেণীতে সীমাবদ্ধ নাৰাখি পঞ্চম আৰু অষ্টম শ্ৰেণীৰ বাবেও প্ৰদান কৰা হ'ব । ইয়াৰ ৰূপৰেখা প্ৰস্তুত কৰি থকা হৈছে বুলি শিক্ষামন্ত্ৰীগৰাকীয়ে জানিবলৈ দিয়ে ।

আনহাতে শিক্ষা সেতু এপত শিক্ষাৰ্থীসকলৰ স্বীকৃতিপ্ৰাপ্ত সফলতা তথা চাৰ্টিফিকেট আদি ডিজিটেলি সংৰক্ষণৰ ব্যৱস্থা কৰাৰ কথাও শিক্ষামন্ত্ৰীগৰাকীয়ে সদৰী কৰে । শিক্ষামন্ত্ৰীয়ে লগতে কয় যে সকলো শিক্ষানুষ্ঠানে ইউ ডাইচ ৰেজিষ্ট্ৰেচন কৰিব লাগিব ।

লগতে পঢ়ক :সময় মানি নচলিলে বিপদ : শিক্ষকৰ উপস্থিতি সন্দৰ্ভত নিৰ্দেশনা জাৰি - Shiksha Setu Axom