సరిహద్దు ఉద్రిక్తతలు ఇప్పుడిప్పుడే తగ్గుముఖం పడుతున్న తరుణంలో చైనా తన వక్రబుద్ధిని మరోమారు బయటపెట్టింది. తూర్పు లద్ధాఖ్లోని వాస్తవాధీన రేఖ వెంబడి పలు ప్రాంతాల్లో దాదాపు 40,000మంది బలగాలను మోహరించింది.
మరోవైపు భారత్తో ఇప్పటివరకు జరిగిన మిలిటరీ, దౌత్య స్థాయి చర్చల్లో కుదిరిన ఒప్పందాలను కూడా చైనా లెక్కచేయడం లేదు. సమస్యాత్మక ప్రాంతాల నుంచి తన బలగాలను చైనా ఉపసంహరించుకోకపోవడమే ఇందుకు కారణమని భారత సైన్యానికి చెందిన ఓ అధికారి వెల్లడించారు.
"సరిహద్దు ఉద్రిక్తతలను తగ్గించేందుకు చైనా ఎలాంటి చర్యలు చేపట్టడం లేదు. అదే సమయంలో తూర్పు లద్ధాఖ్లోని వాస్తవాధీన రేఖ వెంబడి ఉన్న లోతైన ప్రాంతాల్లో దాదాపు 40వేల బలగాలను మోహరించింది. ఈ బలగాలకు భారీ స్థాయిలో అయుధాలు సమకూర్చింది."
---- భారత సైన్యాధికారి.
ఇదీ చూడండి:- చైనా కొత్త కుట్ర- అక్కడి నుంచి వెనక్కి వెళ్లేందుకు నో!
గత వారం భారత్-చైనా మధ్య కార్ప్ కమాండర్ల స్థాయిలో జరిగిన భేటీ అనంతరం.. బలగాల ఉపసంహరణ ప్రక్రియ ముందుకు కదలలేదు. క్షేత్రస్థాయిలో పరిస్థితులు అలాగే ఉన్నట్టు సైనిక అధికారి వెల్లడించారు.
ఫింగర్ 5 ప్రాంతం నుంచి వైదొలిగేందుకు చైనా సముఖంగా లేదని సమాచారం. తమ శాశ్వత స్థానమైన సిరిజప్కు వెనుదిరగకుండా.. అక్కడే ఉండి శిబిరాలను ఏర్పాటు చేసుకునే ఉద్దేశంలో చైనా ఉన్నట్టు తెలుస్తోంది. అదే విధంగా తూర్పు లద్ధాఖ్లోని హాట్ స్ప్రింగ్స్, గోగ్రా ప్రాంతాల్లో చైనా ఆర్మీ నిర్మాణాలు చేపట్టినట్టు కనపడుతోంది.
ఇదీ జరిగింది...
ఈ ఏడాది మే నెల నుంచి సరిహద్దులో భారత్పై చైనా కయ్యానికి కాలుదువ్వుతోంది. ఈ క్రమంలోనే గల్వాన్ లోయలో భారత సైనికులపై చైనీయులు దుస్సాహసానికి పాల్పడ్డారు. ఈ ఘటనలో 20మంది భారత జవాన్లు వీరమరణం పొందారు. అనంతరం ఇరు దేశాల మధ్య ఉద్రిక్తతలు తారస్థాయికి చేరుకున్నాయి. ఈ నేపథ్యంలో పరిస్థితులను అదుపుచేసేందుకు ఇరు దేశాలు అనేకమార్లు చర్చలు జరిపాయి. సమస్యాత్మక ప్రాంతాల నుంచి బలగాలను ఉపసంహరించుకోవాలని అంగీరించాయి.
ఇవీ చూడండి:-
