Water Problem in Podili: వేసవి వచ్చిందంటే చాలు.. ప్రకాశం జిల్లా పొదిలి ప్రజలు దాహార్తికి అల్లాడిపోతారు. ఏళ్లు గడుస్తున్నా.. జనాభా పెరుగుతున్నా.. పట్టణంలో తాగునీటి పథకాలు మాత్రం అభివృద్ధికి నోచుకోవడం లేదు. ప్రజలు సురక్షితమైన తాగునీటి కోసం ఇతర ప్రాంతాలకు వెళ్లక తప్పడం లేదు.
ప్రకాశం జిల్లా పొదిలి నగర పంచాయితీలో తాగునీటి వెతలు తీరడం లేదు. దాదాపు 15వేల జనాభా కలిగిన పొదిలితో పాటు చుట్టుపక్కల గ్రామాలకు సాగర్ నుంచి వచ్చే నీరే ఆధారం. మూడు, నాలుగు రోజులకొకసారి ఈ నీటిని సరఫరా చేస్తారు. ఇవి ఎంత మాత్రమూ చాలడం లేదు. ముఖ్యంగా శివారు కాలనీ వాసులు.. దూరంగా ఉన్న కొళాయిల వద్దకు వెళ్లి తాగునీటిని తెచ్చుకోవలసి వస్తోంది. ఇక ఇంటి అవసరాల కోసం నగర పంచాయతీ పంపించే ట్యాంకులే దిక్కవుతున్నాయి.
ఇదీ చదవండి : ఈఎస్‌ఐ ఆసుపత్రిలో డయాలసిస్ కిట్ల కొరత.. ఇబ్బందుల్లో రోగులు
Drinking Water Problem in Podili: పొదిలికి ఆనుకొని ఉన్న బుచ్చెన్న పాలెం బీసీ కాలనీ, కాటూరి వారి పాలెం, రాంనగర్‌, రాగుపాలెం తదితర 10 కాలనీల పరిస్థితి మరీ దారుణంగా ఉంది. వేసవిలో ప్రభుత్వం ఒక్కో వీధికి రోజూ రెండు మూడు ట్యాంకులు పంపించేది. ప్రస్తుతం 5 రోజులకొకసారి ట్యాంకులు పంపిస్తోంది. దీంతో.. ఇంటికి 10 నుంచి 12 బిందెలు కూడా అందటంలేదు. అంటే రోజుకు ఒక కుటుంబం రెండు బిందెల చొప్పున సరిపెట్టుకోవాల్సి వస్తోందని స్థానికులు ఆవేదన వ్యక్తం చేస్తున్నారు.
గతంలో గ్రామ శివార్లలో డీప్ బోర్లు తవ్వి అక్కడ నుంచి ట్యాంకర్ల ద్వారా నీటిని సరఫరా చేసేవారు. ఈ నీటిని డ్రమ్ముల్లో నిల్వ చేసుకొని ఇక్కడి వారు అవసరాలకు వినియోగించుకునేవారు. ప్రస్తుతం 500 అడుగుల లోతులో డీప్ బోర్లు తవ్వినా అవి పనిచేయడం లేదు. గొట్టపు బావులూ చెడిపోయాయి. కనీసం మరమ్మతులకు కూడా నోచుకోవడం లేదు. పెద్దచెరువులో సాగర్ నీటిని నిల్వచేసి.. వేసవిలో పంపిణీ చేయాలని స్థానికులు కోరుతున్నారు.
"మాకు తీవ్రమైన నీటి సమస్య ఉంది. తాగు నీటి కోసమే కాదు.. వాడుకునే నీటి కోసం సైతం చాలా కష్టపడాల్సి వస్తోంది. బోర్లు ఉన్న వారింటికి వెళ్లి ఒకటి, రెండు బిందెల మంచి నీరు తెచ్చుకుంటున్నాం. ప్రభుత్వం పంపే ట్యాంకర్లు సమయానికి రావు. వచ్చినా అందరికీ సరిపోవడం లేదు." - స్థానికురాలు
"మాకు విపరీతమైన నీటి సమస్య ఉంది. తాగునీరు, నిత్యావసరాల కోసం వాడుకునే నీటి కోసం ఎన్నోపాట్లు పడాల్సి వస్తుంది. బోర్లు ఎండిపోయి పరిస్థితి చాలా దారుణంగా ఉంది. ఎన్నిసార్లు ప్రభుత్వ కార్యాలయాలు, అధికారుల చుట్టూ తిరిగినా ప్రయోజనం లేదు. మా సమస్యను పట్టించుకుని, పరిష్కరించే వారే లేరు." - స్థానికురాలు
" ఇక్కడ చెరువు ఎండిపోవడమే నీటి కొరతకి ప్రధాన సమస్య. చెరువులో నీటిని నిల్వ చేస్తే బోర్లలో నీరు పడతుంది. మాకు నీటి సమస్య తీరుతుంది. " - స్థానికుడు
అధికారులు పట్టించుకుని.. తక్షణం తాగునీటి సమస్య పరిష్కరించాలని పొదిలి ప్రజలు మొరపెట్టుకుంటున్నారు.
ఇదీ చదవండి : అసాంఘిక కార్యకలాపాలకు అడ్డాగా కృష్ణా నది ఘాట్లు.. అసౌకర్యానికి గురవుతున్న భక్తులు
