డేటింగ్ అప్లికేషన్లలో యువకులను ఆకర్షించి మోసాలకు పాల్పడుతున్న ముఠాను తెలంగాణ రాష్ట్రం సైబరాబాద్ పోలీసులు అరెస్ట్ చేశారు. పశ్చిమబంగలోని సిలిగురికి చెందిన ముగ్గురు సభ్యుల ముఠాను అరెస్ట్ చేసి... నిందితుల నుంచి 32 చరవాణులు, 12ఏటీఎం కార్డులు, లాప్టాప్ స్వాధీనం చేసుకున్నారు. సంతుదాసు అనే వ్యక్తి దాదాపు 35 కాల్ సెంటర్లను సిలిగురితో పాటు పరిసర ప్రాంతాల్లో ఏర్పాటు చేశాడు. వీటిని తన ఏజెంట్లకు లీజుకు ఇచ్చాడు. పేరుకు కాల్ సెంటర్లే అయినా లోపల మాత్రం డేటింగ్ అప్లికేషన్ల ద్వారా యువకులను ఆకర్షించే విధంగా ఏర్పాట్లు చేశాడు. పలు సామాజిక మాధ్యమాల్లో ప్రకటనలు ఇచ్చి ఆకర్షించే విధంగా టెలీకాలర్లను నియమించుకున్నాడు. వెబ్ సైట్లను సంప్రదించే యువకులను టెలీకాలర్లతో ఫోన్ చేయించి.. ఆకర్షింపజేస్తాడు. ఆ తర్వాత పలు రుసుముల పేరుతో భారీగా డబ్బులు లాగుతారు.
ఇలా హైదరాబాద్కు చెందిన వ్యక్తి నుంచి 14లక్షల రూపాయలు, షాద్నగర్కు చెందిన యువకుడి నుంచి లక్ష రూపాయలు వసూలు చేశాడు. బాధితులు మోసపోయినట్లు గుర్తించి సైబరాబాద్ సైబర్ క్రైం పోలీసులకు ఫిర్యాదు చేశారు. కేసు నమోదు చేసుకొని దర్యాప్తు చేపట్టిన పోలీసులు ఐపీ అడ్రస్ల ఆధారంగా పశ్చిమబంగలోని సిలిగురికి 20 రోజుల క్రితం వెళ్లారు. స్థానిక పోలీసుల సహకారంతో ముగ్గురిని అరెస్ట్ చేశారు. ప్రధాన నిందితుడు సంతుదాస్ నేపాల్ పారిపోయినట్లు పోలీసులు గుర్తించారు. నేపాల్ సరిహద్దులో ఉన్న సిలిగురిలో చాలామంది ఈ తరహా కాల్ సెంటర్ల పేరుతో వ్యాపారం చేస్తున్నట్లు సైబరాబాద్ సీపీ సజ్జనార్ తెలిపారు. డేటింగ్ అప్లికేషన్లను సంప్రదించొద్దని, వ్యక్తిగత సమాచారాన్ని ఎవరూ ఇతరులతో పంచుకోవద్దన్నారు. డేటింగ్ మోసాలపై 9490617444 నెంబర్కు ఫిర్యాదు చేయొచ్చని సీపీ సజ్జనార్ వెల్లడించారు.
