ਭੇਤਭਰੇ ਹਾਲਾਤਾਂ ਵਿੱਚ 2 ਵਿਦਿਆਰਥੀ ਲਾਪਤਾ

ਹੁਸ਼ਿਆਰਪੁਰ ਦੇ ਮੁਹੱਲਾ ਸੰਤੋਖ ਨਗਰ ਅਤੇ ਦੀਪ ਨਗਰ ਦੇ ਵਿਦਿਆਰਥੀਆਂ ਦੀ ਭੇਤਭਰੇ ਹਾਲਾਤਾਂ ਵਿੱਚ ਲਾਪਤਾ ਹੋਣ ਜਾਣ ਦੀ ਖਬਰ ਸਾਹਮਣੇ ਆਈ ਹੈ। ਦੋਹਾਂ ਵਿਦਿਆਰਥੀਆਂ ਨੂੰ ਲਾਪਤਾ ਹੋਇਆਂ ਨੂੰ 24 ਘੰਟਿਆਂ ਤੋਂ ਵਧੇਰੇ ਦਾ ਸਮਾਂ ਹੋ ਚੁੱਕਾ ਹੈ। ਦੋਵੇਂ ਵਿਦਿਆਰਥੀ ਹੁਸ਼ਿਆਰਪੁਰ ਦੇ ਮੁਹੱਲਾ ਸੁਤੈਹਰੀ ਖੁਰਦ ਵਿੱਚ ਮੌਜੂਦ ਲਕਸ਼ਮੀ ਇਨਕਲੇਵ ਵਿੱਚ ਬਣੇ ਸੈਂਟ ਸੋਲਜ਼ਰ ਡਿਵਾਇਨ ਪਬਲਿਕ ਸਕੂਲ ਵਿੱਚ 10 ਵੀਂ ਜਮਾਤ ਦੇ ਵਿਦਿਆਰਥੀ ਹਨ। ਲਾਪਤਾ ਹੋਏ ਵਿਦਿਆਰਥੀ ਦਾ ਨਾਮ ਜਸਕਰਨ ਸਿੰਘ ਪੁੱਤਰ ਸਰਬਜੀਤ ਸਿੰਘ ਹੈ, ਜੋ ਕਿ ਹੁਸ਼ਿਆਰਪੁਰ ਦੇ ਮੁਹੱਲਾ ਸੰਤੋਖ ਨਗਰ ਦਾ ਰਹਿਣ ਵਾਲਾ ਹੈ। ਦੂਜੇ ਵਿਦਿਆਰਥੀ ਦਾ ਨਾਮ ਧਰੁਵ ਹੈ ਜੋ ਕਿ ਮੁਹੱਲਾ ਦੀਪਨਗਰ ਦਾ ਰਹਿਣ ਵਾਲਾ ਹੈ। ਜਾਣਕਾਰੀ ਮੁਤਾਬਿਕ ਬੀਤੇ ਕੱਲ੍ਹ ਦੋਵੇਂ ਵਿਦਿਆਰਥੀ ਘਰੋਂ ਆਪਣੇ ਸਕੂਲ ਗਏ ਸਨ, ਪਰੰਤੂ ਸਕੂਲ ਨਹੀਂ ਪਹੁੰਚੇ ਤੇ ਸਵੇਰ ਸਮੇਂ ਹੀ ਆਪਣੇ ਕਿਸੇ ਹੋਰ ਦੋਸਤ ਦੇ ਘਰੋਂ ਕਪੜੇ ਬਦਲ ਕੇ ਕਿੱਧਰੇ ਚਲੇ ਗਏ ਤੇ ਪਰਿਵਾਰਾਂ ਨੂੰ ਸਕੂਲ ਤੋਂ ਛੁੱਟੀ ਹੋਣ ਉਪਰੰਤ ਇਸ ਗੱਲ ਦਾ ਪਤਾ ਲੱਗਿਆ। ਪਰਿਵਾਰ ਵਲੋਂ ਇਸ ਦੀ ਜਾਣਕਾਰੀ ਪੁਰਹੀਰਾਂ ਪੁਲਿਸ ਚੌਕੀ ਨੂੰ ਦੇ ਦਿੱਤੀ, ਜਿਨ੍ਹਾਂ ਵਲੋਂ ਵਿਦਿਆਰਥੀਆਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਗਈ ਹੈ।