ਕਸ਼ਮੀਰੀ ਤੇ ਹਿਮਾਚਲੀ ਵਿਦਿਆਰਥੀਆਂ ਵਿਚਕਾਰ ਹੋਈ ਤਕਰਾਰ, ਵੀਡੀਓ ਵਾਇਰਲ

ਖੰਨਾ ਦੇ ਇੱਕ ਕਾਲਜ ਦੀ ਪੁਲਵਾਮਾ ਹਮਲੇ ਤੋਂ ਬਾਅਦ ਵੀਡੀਓ ਹੋਈ ਵਾਇਰਲ। ਵੀਡੀਓ 'ਚ ਹਿਮਾਚਲ ਤੇ ਕਸ਼ਮੀਰ ਵਿਦਿਆਰਥੀਆਂ 'ਚ ਹੋਇਆ ਆਪਸੀ ਵਿਵਾਦ। ਤਕਰਾਰ ਤੋਂ ਬਾਅਦ ਸਹਿਮੇ ਹੋਏ ਨਜ਼ਰ ਆਏ ਕਸ਼ਮੀਰੀ ਵਿਦਿਆਰਥੀ। ਪੁਲਿਸ ਨੇ ਦੋਹਾਂ ਪੱਖਾਂ ਦਾ ਕਰਵਾਇਆ ਸਮਝੌਤਾ।

ਖੰਨਾ: ਸ਼ਹਿਰ 'ਚ ਸਥਿਤ ਇੱਕ ਨਿਜੀ ਕਾਲਜ 'ਚ ਪੜ੍ਹ ਰਹੇ ਕਸ਼ਮੀਰੀ ਤੇ ਹਿਮਾਚਲੀ ਵਿਦਿਆਰਥੀਆਂ ਦੀ ਪੁਲਵਾਮਾ ਹਮਲੇ ਤੋਂ ਬਾਅਦ ਆਪਸ ਚ ਤਕਰਾਰ ਹੋ ਗਈ ਜਿਸ ਦਾ ਵੀਡੀਓ ਸੋਸ਼ਲ ਮੀਡੀਆ ਤੇ ਵਾਇਰਲ ਹੋ ਗਿਆ ਹੈ। ਇਹ ਵੀਡੀਓ ਕਸ਼ਮੀਰੀ ਵਿਦਿਆਰਥੀਆਂ ਨੇ ਆਪ ਬਣਾ ਕੇ ਵਾਇਰਲ ਕੀਤਾ ਹੈ।ਇਸ ਵੀਡੀਓ ਵਿੱਚ ਕਸ਼ਮੀਰੀ ਤੇ ਹਿਮਾਚਲੀ ਵਿਦਿਆਰਥੀਆਂ ਵਿਚਕਾਰ ਆਪਸੀ ਵਿਵਾਦ ਹੁੰਦਾ ਹੋਇਆ ਨਜ਼ਰ ਆ ਰਿਹਾ ਹੈ।

ਇੱਕ ਪਾਸੇ ਜਿੱਥੇ ਹਿਮਾਚਲੀ ਵਿਦਿਆਰਥੀਆਂ ਨੇ ਕਸ਼ਮੀਰੀ ਵਿਦਿਆਰਥੀਆਂ 'ਤੇ ਅਕਸਰ ਹੋਸਟਲ ਵਿੱਚ ਰੋਲਾ ਪਾਉਣ ਤੇ ਕਈ ਵਾਰ ਪਾਕਿਸਤਾਨ ਜਿੰਦਾਬਾਦ ਦੇ ਨਾਅਰੇ ਲਾਉਣ ਦਾ ਦੋਸ਼ ਲਗਾਇਆ, ਉੱਥੇ ਹੀ ਦੂਜੇ ਪਾਸੇ, ਕਸ਼ਮੀਰੀ ਵਿਦਿਆਰਥੀਆਂ ਨੇ ਆਪਣੇ 'ਤੇ ਲੱਗੇ ਦੋਸ਼ਾਂ ਨੂੰ ਝੂਠਾ ਤੇ ਬੇਬੁਨਿਆਦ ਦੱਸਿਆ।ਦੋਹਾਂ ਪੱਖਾਂ ਨੇ ਇੱਕ-ਦੂਜੇ 'ਤੇ ਤੰਗ ਕਰਨ ਦੇ ਦੋਸ਼ ਲਗਾਏ ਜਿਸ ਤੋਂ ਬਾਅਦ ਗੱਲ ਇੰਨੀਂ ਕੁ ਵੱਧ ਗਈ ਕਿ ਪੁਲਿਸ ਨੂੰ ਬੁਲਾਉਣਾ ਪਿਆ। ਫਿਲਹਾਲ ਪੁਲਿਸ ਨੇ ਦੋਹਾਂ ਪੱਖਾਂ ਦਾ ਸਮਝੌਤਾ ਕਰਵਾ ਦਿੱਤਾ ਹੈ।