ਬਠਿੰਡਾ: ਅੱਜ ਵਿਕਾਸ ਦੇ ਨਾਂ ਉੱਤੇ ਧੜਾਧੜ ਕੱਟੇ ਜਾ ਰਹੇ ਦਰੱਖਤਾਂ ਕਾਰਨ ਹਵਾ ਅਤੇ ਪਾਣੀ ਵਿੱਚ ਪ੍ਰਦੂਸ਼ਣ ਲਗਾਤਾਰ ਵੱਧ ਰਿਹਾ ਹੈ ਪਰ ਦੂਜੇ ਪਾਸੇ ਬਠਿੰਡਾ ਦੇ ਪਿੰਡ ਗੋਬਿੰਦਪੁਰਾ ਵਿੱਚ ਸੈਂਕੜੇ ਸਦੀਆਂ ਪੁਰਾਣੀ ਝਿੜੀ ਵਿਰਾਸਤੀ ਦਰੱਖਤਾਂ ਨੂੰ ਆਪਣੇ ਵਿੱਚ ਸਮੋਈ ਬੈਠੀ ਹੈ। ਇਹ ਝਿੜੀ ਕਰੀਬ ਚਾਰ ਸੌ ਏਕੜ ਵਿੱਚ ਬਣੀ ਹੈ।
ਕੀ ਇਤਿਹਾਸ ਹੈ ਪਿੰਡ ਗੋਬਿੰਦਪੁਰਾ ਦੀ ਝਿੜੀ
ਪਿੰਡ ਗੋਬਿੰਦਪੁਰਾ ਵਿੱਚ ਬਣੀ ਇਸ ਝਿੜੀ ਦੇ ਇਤਿਹਾਸ ਨੂੰ ਸਾਂਝਾ ਕਰਦੇ ਹੋਏ ਪਿੰਡ ਵਾਸੀਆਂ ਨੇ ਕਿਹਾ ਕਿ ਇਸ ਥਾਂ ਉੱਤੇ ਭਾਈ ਭਗਤੂ ਜੀ ਗਾਵਾਂ ਚਰਾਉਂਦੇ ਸਨ। ਇੱਕ ਦਿਨ ਉਨ੍ਹਾਂ ਦੀ ਮਾਤਾ ਜੀ ਨੇ ਉਨ੍ਹਾਂ ਤੋਂ ਸਵਾਲ ਕੀਤਾ ਕਿ ਤੁਸੀਂ ਆਪਣੀਆਂ ਗਾਵਾਂ ਨੂੰ ਪਾਣੀ ਕਿੱਥੋਂ ਪਿਆਉਂਦੇ ਹੋ, ਮੈਂ ਵੇਖਣਾ ਚਾਹੁੰਦੀ ਹਾਂ?
ਬਾਬਾ ਜੀ ਨੇ ਕਿਹਾ ਕਿ ਮੈਂ ਤੁਹਾਡੇ ਲਈ ਪਾਣੀ ਲੈ ਕੇ ਆਉਂਦਾ ਹਾਂ ਜੇਕਰ ਫੇਰ ਵੀ ਤੁਹਾਨੂੰ ਜ਼ਰੂਰਤ ਪਈ ਤਾਂ ਉਨ੍ਹਾਂ ਨੇ ਇੱਕ ਇੱਟ ਚੁੱਕ ਕੇ ਪਾਣੀ ਪੀਣ ਲਈ ਕਿਹਾ। ਮਾਤਾ ਜੀ ਨੇ ਬਾਬਾ ਜੀ ਦੇ ਜਾਣ ਉਪਰੰਤ ਜਦੋਂ ਇੱਟ ਚੁੱਕੀ ਤਾਂ ਹਰ ਪਾਸੇ ਪਾਣੀ ਹੀ ਪਾਣੀ ਹੋ ਗਿਆ। ਜਿਸ ਉੱਤੇ ਬਾਬਾ ਭਗਤੂ ਜੀ ਨੇ ਕਿਹਾ ਕਿ ਤੁਸੀਂ ਮੈਨੂੰ ਪ੍ਰਤੱਖ ਨਹੀਂ ਕਰਨਾ ਸੀ ਉਸ ਮਗਰੋਂ ਭਾਈ ਭਗਤੂ ਜੀ ਪਤਾ ਨਹੀਂ ਕਿੱਥੇ ਚਲੇ ਗਏ।
ਇਨ੍ਹਾਂ ਝਿੜੀ ਨੂੰ ਲੈ ਕੇ ਪਿੰਡ ਵਾਸੀਆਂ ਦੀ ਮਾਨਤਾ ਹੈ ਕਿ ਜੋ ਵੀ ਵਿਅਕਤੀ ਇਸ ਝਿੜੀ ਵਿਚਾਲੇ ਦਰੱਖਤਾਂ ਦਾ ਇੱਕ ਵੀ ਡੱਕਾ ਘਰ ਲੈ ਕੇ ਜਾਂਦਾ ਹੈ ਤਾਂ ਉਸ ਦਾ ਆਰਥਿਕ ਤੌਰ ਉੱਤੇ ਨੁਕਸਾਨ ਹੋਣਾ ਸ਼ੁਰੂ ਹੋ ਜਾਂਦਾ ਹੈ। ਇਸ ਲਈ ਇਸ ਝਿੜੀ ਵਿੱਚ ਕੋਈ ਵੀ ਵਿਅਕਤੀ ਦਰੱਖਤਾਂ ਦੀ ਕਟਾਈ ਨਹੀਂ ਕਰਦਾ।
ਡੇਰਾ ਭੈਣਾ ਸਾਹਿਬ ਕਰਦੇ ਨੇ ਗੋਬਿੰਦਪੁਰਾ ਦੀ ਝਿੜੀ ਦੀ ਦੇਖਰੇਖ
ਫਿਲਹਾਲ ਹੁਣ ਇਸ ਝਿੜੀ ਦੀ ਦੇਖਭਾਲ ਕੌਣ ਕਰਦਾ ਹੈ ਇਸ ਉੱਤੇ ਪਿੰਡ ਗੋਬਿੰਦਪੁਰਾ ਦੇ ਸਰਪੰਚ ਨਵਤੇਜ ਸਿੰਘ ਨੇ ਕਿਹਾ ਕਿ ਡੇਰਾ ਬਾਬਾ ਭੈਣਾ ਸਾਹਿਬ ਜੀ ਇਸ ਝਿੜੀ ਦੀ ਦੇਖਰੇਖ ਕਰਦੇ ਹਨ। ਇਨ੍ਹਾਂ ਰੁੱਖਾਂ ਨੂੰ ਪਾਣੀ ਜਦੋਂ ਮੀਂਹ ਪੈਂਦਾ ਹੈ ਉਦੋਂ ਹੀ ਪਾਣੀ ਮਿਲਦਾ ਹੈ। ਬਾਕੀ ਇਸ ਝਿੜੀ ਦੇ ਰੁੱਖਾਂ ਦੀ ਜੜ੍ਹਾਂ ਡੁੱਘੀਆਂ ਹਨ ਉਹ ਜਮੀਨ ਤੋਂ ਹੀ ਪਾਣੀ ਪੀ ਲੈਂਦੀਆਂ ਹਨ।
ਝਿੜੀ 'ਚ ਕਿਹੜੇ-ਕਿਹੜੇ ਰੁੱਖ ਨੇ
ਪਿੰਡ ਵਾਸੀਆਂ ਨੇ ਕਿਹਾ ਕਿ ਇਸ ਝਿੜੀ 'ਚ ਮਲਾਂ, ਬੜ, ਕਰੀਰ, ਪਿੱਪਲ, ਬੋਹੜ, ਕਿੱਕਰ, ਪਹਾੜੀ ਕਿੱਕਰ (ਫਲਾਹੀ), ਟਾਲੀ, ਅੰਬ, ਜੰਡ ਆਦਿ ਤਰ੍ਹਾਂ ਦੇ ਰੁੱਖ ਹਨ।
