ਚੰਡੀਗੜ੍ਹ: ਅਮਰ ਸਿੰਘ ਚਮਕੀਲਾ ਦੇ ਗੀਤਾਂ ਦੀ ਆਲੋਚਨਾ ਲੋਕ ਅੱਜ ਤੱਕ ਕਰਦੇ ਹਨ। ਦੱਸ ਦਈਏ ਅਮਰ ਸਿੰਘ ਚਮਕੀਲਾ ਨੇ ਧਾਰਮਿਕ ਗੀਤਾਂ ਨੂੰ ਵੀ ਆਪਣੀ ਆਵਾਜ਼ ਦੇ ਨਾਲ ਸ਼ਿੰਘਾਰਿਆ ਹੈ। ਅਮਰ ਸਿੰਘ ਚਮਕੀਲਾ ਅਤੇ ਅਮਰਜੋਤ ਦੀ ਆਵਾਜ਼ ਵਿੱਚ ਪਹਿਲਾ ਧਾਰਮਿਕ ਗੀਤ ‘ਤਲਵਾਰ ਮੈਂ ਕਲਗੀਧਰ ਦੀ ਹਾਂ’ 1985 ਵਿੱਚ ਐਚਐਮਵੀ ਕੰਪਨੀ ਨੇ ਰਿਕਾਰਡ ਕੀਤਾ ਸੀ। ਮਰਹੂਮ ਗੀਤਕਾਰ ਸਨਮੁੱਖ ਸਿੰਘ ਆਜ਼ਾਦ ਵੱਲੋਂ ਇਸ ਗੀਤ ਦੇ ਬੋਲ ਲਿਖੇ ਗਏ ਸਨ। ਇਹ ਗੀਤ ਸਾਲ 1985 'ਚ ਬਹੁਤ ਪ੍ਰਸਿੱਧ ਹੋਇਆ।
1986 ਦੇ ਵਿੱਚ ਵੀ ਚਮਕੀਲਾ ਅਤੇ ਅਮਰਜੋਤ ਦੀ ਜੋੜੀ ਨੇ ਕਮਾਲ ਕੀਤਾ। ਇਸ ਸਾਲ ‘ਨਾਮ ਜਪ ਲੈ’ ਗੀਤ ਰਿਕਾਰਡ ਹੋਇਆ। ਇਹ ਗੀਤ ਵੀ ਸੁਪਰਹਿੱਟ ਸਾਬਿਤ ਹੋਇਆ। ਸਾਲ 1987 ਦੇ ਵਿੱਚ ਧਾਰਮਿਕ ਟੇਪ ‘ਬਾਬਾ ਤੇਰਾ ਨਨਕਾਣਾ’ ਰਿਲੀਜ਼ ਹੋਈ। ਇਸ ਟੇਪ ਦੇ ਵਿੱਚ ਕੁੱਲ 9 ਗੀਤ ਸਨ। ਇਸ ਟੇਪ ਵਿਚਲਾ ਗੀਤ ‘ਸਾਥੋਂ ਬਾਬਾ ਖੋਹ ਲਿਆ ਤੇਰਾ ਨਨਕਾਣਾ’ ਸਦਾਬਹਾਰ ਗੀਤਾਂ ਦੇ ਵਿੱਚ ਸ਼ਾਮਿਲ ਹੈ। ਇਸ ਨੂੰ ਪ੍ਰਸਿੱਧ ਗੀਤਕਾਰ ਸਵਰਨ ਸੀਵੀਆ ਨੇ ਲਿਖਿਆ ਅਤੇ ਇਸ ਦਾ ਮਿਊਜ਼ਿਕ ਚਮਕੀਲੇ ਨੇ ਆਪ ਤਿਆਰ ਕੀਤਾ।
ਚਮਕੀਲੇ ਦੇ ਗਾਏ ਧਾਰਮਿਕ ਗੀਤ ‘ਨੀ ਤੂੰ ਨਰਕਾਂ ਨੂੰ ਜਾਵੇਂ ਸਰਹਿੰਦ ਦੀ ਦੀਵਾਰੇ’, ‘ਬਾਬਾ ਦੀਪ ਸਿੰਘ’, ‘ਕਾਲਜੇ ਨੂੰ ਚੀਸ ਪੈ ਗਈ’ ਸੁਣ ਕੇ ਮਨ ਨੂੰ ਜੋ ਸ਼ਾਂਤੀ ਮਿਲਦੀ ਹੈ ਉਹ ਹੋਰ ਕੀਤੇ ਨਹੀਂ ਮਿਲਦੀ।
ਅਕਸਰ ਦਰਸ਼ਕ ਇਹ ਗੱਲ ਕਹਿਣ ਤੋਂ ਗੁਰੇਜ਼ ਨਹੀਂ ਕਰਦੇ ਇਸ ਗਾਇਕ ਨੇ ਚੰਗਾ ਨਹੀਂ ਗਾਇਆ, ਇਸ ਗਾਇਕ ਨੇ ਪੰਜਾਬੀ ਮਾਂ ਬੋਲੀ ਦਾ ਤਿਰਸਕਾਰ ਕੀਤਾ। ਉਨ੍ਹਾਂ ਨੂੰ ਇੱਕ ਗੱਲ ਯਾਦ ਰੱਖਣੀ ਚਾਹੀਦੀ ਹੈ ਗਾਇਕ ਉਹ ਹੀ ਗਾਉਂਦਾ ਹੈ ਜੋ ਦਰਸ਼ਕ ਪਸੰਦ ਕਰਦੇ ਹਨ।
