ਮੁੰਬਈ: ਹਾਲ ਹੀ 'ਚ ਅਮਿਤਾਭ ਬੱਚਨ ਤੇ ਤਾਪਸੀ ਪਨੂੰ ਦੀ ਫ਼ਿਲਮ 'ਬਦਲਾ' ਦਾ ਪਹਿਲਾ ਗਾਣਾ 'ਕਿਉਂ ਰੱਬਾ' ਰਿਲੀਜ਼ ਹੋਇਆ ਸੀ। ਇਸ ਤੋਂ ਬਾਅਦ ਹੁਣ ਫ਼ਿਲਮ ਦਾ ਇੱਕ ਹੋਰ ਗਾਣਾ 'ਔਕਾਤ' ਰਿਲੀਜ਼ ਕਰ ਦਿੱਤਾ ਗਿਆ ਹੈ। ਇਸ ਗੀਤ ਨੂੰ ਖੁਦ ਅਮਿਤਾਭ ਨੇ ਸੋਸ਼ਲ ਮੀਡੀਆ ਰਾਹੀਂ ਰਿਲੀਜ਼ ਕੀਤਾ ਹੈ।
'ਔਕਾਤ' ਗਾਣੇ 'ਚ ਅਮਿਤਾਭ ਕਾਫ਼ੀ ਅਲੱਗ ਅੰਦਾਜ਼ 'ਚ ਨਜ਼ਰ ਆ ਰਹੇ ਹਨ। ਅਮਿਤਾਭ ਬੱਚਨ ਨੇ ਟਵੀਟ ਰਾਹੀਂ ਇਸ ਗਾਣੇ ਨੂੰ ਸ਼ੇਅਰ ਕੀਤਾ ਅਤੇ ਇਸ ਦੇ ਨਾਲ ਹੀ ਉਨ੍ਹਾਂ ਪਾਕਿਸਤਾਨ ਤੋਂ ਵਤਨ ਪਰਤੇ ਵਿੰਗ ਕਮਾਂਡਰ ਅਭਿਨੰਦਨ ਲਈ ਖ਼ੁਸ਼ੀ ਜ਼ਾਹਰ ਕੀਤੀ।
ਦੱਸ ਦਈਏ ਕਿ ਇਸ ਤੋਂ ਪਹਿਲੇ ਵੀ ਅਮਿਤਾਭ ਬੱਚਨ ਨੇ ਭਾਰਤ ਵੱਲੋਂ ਲਿਆਂਦੀ ਗਈ 'ਏਅਰ ਸਟਾਈਰਕ' ਨੂੰ ਲੈ ਕੇ ਟਵੀਟ ਕੀਤਾ ਸੀ। ਬਾਲੀਵੁੱਡ ਦੇ ਸ਼ਹਿਨਸ਼ਾਹ ਨੇ ਅਲੱਗ ਅੰਦਾਜ਼ 'ਚ ਭਾਰਤੀ ਵੀਰਾਂ ਨੂੰ ਸੈਲਿਊਟ ਕੀਤਾ ਸੀ। ਅਮਿਤਾਭ ਬਚਨ ਨੇ ਸੋਸ਼ਲ ਮੀਡੀਆ 'ਤੇ ਇਕ ਤਸਵੀਰ ਸ਼ੇਅਰ ਕੀਤੀ ਸੀ।
ਉਸ ਤਸਵੀਰ 'ਚ ਅਮਿਤਾਭ ਕਾਫੀ ਭਾਵੁਕ ਨਜ਼ਰ ਆ ਰਹੇ ਸਨ। ਇਸ ਤਸਵੀਰ ਨੂੰ ਸ਼ੇਅਰ ਕਰਦਿਆਂ ਅਮਿਤਾਭ ਬੱਚਨ ਨੇ ਭਾਰਤ ਦੇ ਤਿੰਰਗੇ ਨੂੰ ਕੈਪਸ਼ਨ 'ਚ ਰੱਖਿਆ ਸੀ। ਇਹ ਇਕ ਤਿੰਰਗਾ ਨਹੀਂ ਬਲਕਿ ਕੁੱਲ 118 ਤਿੰਰਗੇ ਸਨ ਜੋ ਕਿ ਈਮੋਜੀ ਫ਼ਾਰਮ 'ਚ ਸਨ।
