ਚੰਡੀਗੜ੍ਹ: ਪੰਜਾਬੀ ਸਿਨੇਮਾ ਅਤੇ ਮਿਊਜ਼ਿਕ ਵੀਡੀਓਜ਼ ਦੇ ਖੇਤਰ ਵਿਚ ਚੋਖ਼ਾ ਨਾਮਣਾ ਖੱਟ ਚੁੱਕੀ ਖੂਬਸੂਰਤ ਅਤੇ ਪ੍ਰਤਿਭਾਵਾਨ ਅਦਾਕਾਰਾ ਓਸ਼ਿਨ ਬਰਾੜ (Oshin Brar Upcoming Film) ਇਕ ਹੋਰ ਸ਼ਾਨਦਾਰ ਸਿਨੇਮਾ ਪਾਰੀ ਵੱਲ ਵਧਣ ਜਾ ਰਹੀ ਹੈ, ਜੋ ਰਿਲੀਜ਼ ਹੋਣ ਵਾਲੀਆਂ ਕਈ ਆਉਣ ਵਾਲੀਆਂ ਫਿਲਮਾਂ ਵਿਚ ਪ੍ਰਮੁੱਖ ਅਤੇ ਲੀਡ ਭੂਮਿਕਾਵਾਂ ਵਿਚ ਨਜ਼ਰ ਆਵੇਗੀ।
ਮੂਲ ਰੂਪ ਵਿਚ ਪੰਜਾਬ ਦੇ ਮੋਹਾਲੀ ਨਾਲ ਸੰਬੰਧਤ ਇਸ ਹੋਣਹਾਰ ਅਦਾਕਾਰਾ ਵੱਲੋਂ ਆਪਣੇ ਫਿਲਮ ਕਰੀਅਰ ਦਾ ਆਗਾਜ਼ ਦਿਲਜੀਤ ਦੁਸਾਂਝ ਸਟਾਰਰ 'ਮੁਖਤਿਆਰ ਚੱਢਾ' ਨਾਲ ਕੀਤਾ ਗਿਆ ਸੀ, ਜਿਸ ਵਿਚ ਉਸ ਵੱਲੋਂ ਨਿਭਾਈ ਭੂਮਿਕਾ ਨੂੰ ਕਾਫ਼ੀ ਸਲਾਹੁਤਾ ਮਿਲ ਚੁੱਕੀ ਹੈ। ਇਸ ਤੋਂ ਇਲਾਵਾ ਹੁਣ ਤੱਕ ਦੇ ਫਿਲਮ ਕਰੀਅਰ ਦੌਰਾਨ ਉਸ ਦੁਆਰਾ ਕੀਤੀਆਂ 'ਸਾਕਾ', 'ਸ਼ਰੀਕ' ਜਿਹੀਆਂ ਕਈ ਬਹੁ-ਚਰਚਿਤ ਫਿਲਮਾਂ ਵੀ ਉਸ ਦੀ ਨਾਯਾਬ ਅਦਾਕਾਰੀ ਦਾ ਪ੍ਰਭਾਵੀ ਰੂਪ ਵਿਚ ਲੋਹਾ ਮੰਨਵਾਉਣ ਵਿਚ ਸਫ਼ਲ ਰਹੀਆਂ ਹਨ।
ਪੰਜਾਬੀ ਸੰਗੀਤਕ ਖੇਤਰ ਵਿਚ ਆਪਾਰ ਮਕਬੂਲੀਅਤ ਹਾਸਿਲ ਕਰਨ ਵਾਲੇ ਕਈ ਮਿਊਜ਼ਿਕ ਵੀਡੀਓਜ਼ ਦਾ ਹਿੱਸਾ ਰਹੀ ਹੈ ਇਹ ਦਿਲਕਸ਼ ਅਦਾਕਾਰਾ, ਜਿਸ ਵੱਲੋਂ ਤਰਸੇਮ ਜੱਸੜ, ਇੰਦਰ ਚਾਹਲ ਆਦਿ ਜਿਹੇ ਮੰਨੇ ਪ੍ਰਮੰਨੇ ਗਾਇਕਾਂ ਦੇ ਸੰਗੀਤਕ ਵੀਡੀਓਜ਼ ਵਿਚ ਫ਼ੀਚਰਿੰਗ ਕੀਤੀ ਜਾ ਚੁੱਕੀ ਹੈ। ਪੰਜਾਬ ਤੋਂ ਲੈ ਕੇ ਸੱਤ ਸੁਮੰਦਰ ਪਾਰ ਤੱਕ ਆਪਣੀਆਂ ਬਹੁਆਯਾਮੀ ਕਲਾਵਾਂ ਦਾ ਪ੍ਰਗਟਾਵਾ ਕਰ ਚੁੱਕੀ ਇਹ ਅਦਾਕਾਰਾ ਪਿਛਲੇ ਕਾਫ਼ੀ ਸਮੇਂ ਤੋਂ ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆਂ ਖਿੱਤੇ ਵਿਚ ਆਪਣੀ ਕਲਾ ਗਤੀਵਿਧੀਆਂ ਨੂੰ ਅੰਜ਼ਾਮ ਦੇ ਰਹੀ ਹੈ, ਜਿੱਥੇ ਸ਼ੂਟ ਹੋ ਚੁੱਕੇ ਕਈ ਹਾਲੀਆਂ ਅਤੇ ਵੱਡੇ ਸੰਗੀਤਕ ਵੀਡੀਓਜ਼ ਵਿਚ ਪ੍ਰਭ ਗਿੱਲ ਦਾ ‘ਸ਼ੁਕਰਗੁਜ਼ਾਰ’, ਬੰਟੀ ਬੈਂਸ ਦੇ ਪ੍ਰੋਜੈਕਟ ‘ਜੱਟੀ ਤੇਰੀ ਟੌਮ ਵਰਗੀ’, ਸੈਵੀ ਨਾਗਰਾ ਅਤੇ ਗੁਰਲੇਜ਼ ਅਖ਼ਤਰ ਦਾ ‘ਫੁੱਲਝੜੀ’, ਪਲਵਿੰਦਰ ਥੋਰਾ ਦਾ ‘ਕੰਗਨਾ’, ਹੈਪੀ ਰਾਏਕੋਟੀ ਦਾ ‘ਮੈਂ ਜਾਂ ਮਾਂ’ ਆਦਿ ਸ਼ਾਮਿਲ ਹਨ, ਇਸ ਵਿਚ ਵੀ ਉਸ ਵੱਲੋਂ ਬਤੌਰ ਮਾਡਲ ਲੀਡ ਭੂਮਿਕਾਵਾਂ ਨਿਭਾਈਆਂ ਜਾ ਚੁੱਕੀਆਂ ਹਨ।
ਲੰਮੇਰੇ ਸਮੇਂ ਬਾਅਦ ਫਿਰ ਆਪਣੀ ਸਿਨੇਮਾ ਵਾਪਸੀ ਵੱਲ ਵਧੀ ਇਸ ਪ੍ਰਤਿਭਾਸ਼ਾਲੀ ਅਦਾਕਾਰਾ ਨੇ ਦੱਸਿਆ ਕਿ ਉਸ ਦੀਆਂ ਦੋ ਨਵੀਆਂ ਫਿਲਮਾਂ ਜਿੰਨ੍ਹਾਂ ਵਿਚ ਰਣਜੀਤ ਬਾਵਾ ਸਟਾਰਰ ਅਤੇ ਸ਼ਿਤਿਜ਼ ਚੌਧਰੀ ਨਿਰਦੇਸ਼ਿਤ ‘ਪ੍ਰਾਹੁਣਾ 2’ ਅਤੇ ਸ਼ਿਵਿਮ ਸ਼ਰਮਾ ਦੁਆਰਾ ਨਿਰਦੇਸ਼ਿਤ ਕੀਤੀ ਗਈ ‘ਅੰਗਰੇਜ਼ ਪੁੱਤ' ਸ਼ਾਮਿਲ ਹਨ, ਜਿਸ ਦੀ ਸ਼ੂਟਿੰਗ ਕੈਨੇਡਾ ਅਤੇ ਲੰਦਨ ਆਦਿ ਵਿਖੇ ਪੂਰੀ ਹੋ ਚੁੱਕੀ ਹੈ, ਜਿੰਨ੍ਹਾਂ ਵਿਚ ਉਸ ਵੱਲੋਂ ਕਾਫ਼ੀ ਮਹੱਤਵਪੂਰਨ ਭੂਮਿਕਾਵਾਂ ਨਿਭਾਈਆਂ ਜਾ ਰਹੀਆਂ ਹਨ।
ਉਸ ਨੇ ਦੱਸਿਆ ਕਿ ਪੰਜਾਬੀ ਸਿਨੇਮਾ (Punjabi cinema) ਦੇ ਯੋਗਰਾਜ ਸਿੰਘ, ਬੀ.ਐਨ ਸ਼ਰਮਾ, ਸੁਮਿਤ ਗੁਲਾਟੀ ਅਤੇ ਹੋਰ ਨਾਮਵਰ ਐਕਟਰਜ਼ ਨਾਲ ਉਸ ਵੱਲੋਂ ਕੀਤੀ ਗਈ ‘ਅੰਗਰੇਜ਼ ਪੁੱਤ’ ਵਿਚ ਉਹ ਲੀਡ ਭੂਮਿਕਾ ਅਦਾ ਕਰ ਰਹੀ ਹੈ, ਜਿਸ ਵਿਚ ਉਹ ਪਹਿਲੋ ਨਿਭਾਏ ਮੇਨ ਸਟਰੀਮ ਕਿਰਦਾਰਾਂ ਨਾਲੋਂ ਇਕਦਮ ਅਲਹਦਾ ਰੋਲ ਵਿਚ ਨਜ਼ਰ ਆਵੇਗੀ।
ਪੰਜਾਬੀ ਫਿਲਮ ਇੰਡਸਟਰੀ (Punjabi cinema) ਵਿਚ ਹੁਣ ਪੂਰੀ ਲਗਾਤਾਰਤਾ ਨਾਲ ਕੰਮ ਕਰਨ ਦੀ ਖ਼ਵਾਹਿਸ਼ ਰੱਖਦੀ ਇਹ ਬੇਹਤਰੀਨ ਅਦਾਕਾਰਾ ਆਪਣੀਆਂ ਆਗਾਮੀ ਸਿਨੇਮਾ ਯੋਜਨਾਵਾਂ ਸੰਬੰਧੀ ਚਰਚਾ ਕਰਦਿਆਂ ਦੱਸਿਆ ਕਿ ਕੁਝ ਹੋਰ ਫਿਲਮਜ਼ ਪ੍ਰੋਜੈਕਟ ਵੀ ਉਹ ਕਰਨ ਜਾ ਰਹੀ ਹੈ, ਜਿੰਨ੍ਹਾਂ ਦਾ ਰਸਮੀ ਐਲਾਨ ਸੰਬੰਧਤ ਪ੍ਰੋਡੋਕਸ਼ਨਜ਼ ਹਾਊਸਜ਼ ਵੱਲੋਂ ਜਲਦ ਕੀਤਾ ਜਾਵੇਗਾ।
