ਹੈਦਰਾਬਾਦ: ਰਾਜਸਥਾਨ ਵਿੱਚ ਹਾਲ ਹੀ 'ਚ ਅਸ਼ੋਕ ਗਹਿਲੋਤ ਅਤੇ ਸਚਿਨ ਪਾਇਲਟ ਵਿਚਕਾਰ ਕੁਰਸੀ ਦੀ ਲੜਾਈ ਭਾਵੇਂ ਹੁਣ ਸਾਹਮਣੇ ਆਈ ਹੈ, ਪਰ ਮਾਹਰਾਂ ਮੁਤਾਬਕ ਇਹ ਲੜਾਈ 3 ਸਾਲ ਪਹਿਲਾਂ ਹੀ ਸ਼ੁਰੂ ਹੋ ਗਈ ਸੀ। ਆਖ਼ਰਕਾਰ ਦੋਹਾਂ ਵੱਡੇ ਆਗੂਆਂ ਵਿਚਕਾਰ ਲੜਾਈ ਕਿੱਥੇ ਜਾ ਕੇ ਖ਼ਤਮ ਹੋਵੇਗੀ, ਕੀ ਪਾਰਟੀ ਟੁੱਟ ਜਾਵੇਗੀ ਜਾਂ ਕਾਂਗਰਸ ਹਾਈ ਕਮਾਂਡ ਸਚਿਨ ਪਾਇਲਟ ਨੂੰ ਯਕੀਨ ਦਿਵਾਉਣ ਵਿੱਚ ਸਫਲ ਹੋਵੇਗੀ, ਸਭ ਦੇ ਦਿਮਾਗ ਵਿੱਚ ਅਜਿਹੇ ਕਈ ਸਵਾਲ ਹਨ।
ਇਸ ਲੜਾਈ ਵਿੱਚ ਕਾਂਗਰਸ ਨੂੰ ਕਿੰਨਾ ਨੁਕਸਾਨ ਸਹਿਣਾ ਪਵੇਗਾ, ਇਹ ਅੰਦਾਜ਼ਾ ਲਗਾਉਣਾ ਅਸਾਨ ਨਹੀਂ ਹੈ। ਕਈ ਰਾਸ਼ਟਰੀ ਅਖ਼ਬਾਰਾਂ ਦੇ ਸੰਪਾਦਕ ਰਹਿ ਚੁੱਕੇ ਯਤੀਸ਼ ਰਾਜਾਵਤ ਅਤੇ ਰਾਜਨੀਤਿਕ ਮਾਹਰ ਅਭਿਰੰਜਨ ਕੁਮਾਰ ਨੇ ਈਟੀਵੀ ਭਾਰਤ ਨਾਲ ਕਾਂਗਰਸ ਪਾਰਟੀ ਦੇ ਵਿੱਚ ਸਿਆਸੀ ਸੰਕਟ ਅਤੇ ਗਾਂਧੀ ਪਰਿਵਾਰ ਦੀ ਭੂਮਿਕਾ ਬਾਰੇ ਵਿਚਾਰ ਵਟਾਂਦਰੇ ਕੀਤੇ।
ਗਹਿਲੋਤ ਚਾਹੁੰਦੇ ਹਨ ਕਿ ਪਾਇਲਟ ਦੇ ਪੈਰ ਨਾ ਜੰਮ ਸਕਣ
ਪੱਤਰਕਾਰ ਯਤੀਸ਼ ਰਾਜਾਵਤ ਖ਼ੁਦ ਰਾਜਸਥਾਨ ਦੇ ਰਹਿਣ ਵਾਲੇ ਹਨ ਅਤੇ ਇਸ ਗੱਲ ਦਾ ਗਵਾਹ ਰਹੇ ਹਨ ਕਿ ਅਸ਼ੋਕ ਗਹਿਲੋਤ ਕਿਸੇ ਨੂੰ ਆਪਣੀ ਤਾਕਤ ਦੇ ਬਰਾਬਰ ਉਭਰਦੇ ਹੋਏ ਨਹੀਂ ਦੇਖਣਾ ਚਾਹੁੰਦੇ, ਇਸ ਲਈ ਉਨ੍ਹਾਂ ਨੇ ਸਚਿਨ ਨੂੰ ਅੱਗੇ ਆਉਣ ਤੋਂ ਰੋਕਣ ਲਈ ਕੋਈ ਮੌਕਾ ਨਹੀਂ ਛੱਡਿਆ। ਸਚਿਨ ਨੇ ਵਿਦੇਸ਼ਾਂ ਵਿੱਚ ਪੜ੍ਹਾਈ ਕੀਤੀ ਹੈ, ਗਹਿਲੋਤ ਨੇ ਹਮੇਸ਼ਾਂ ਜ਼ਿਆਦਾਤਰ ਮੌਕਿਆਂ 'ਤੇ ਉਨ੍ਹਾਂ ਦੀ ਪੜ੍ਹਾਈ ਅਤੇ ਪਿਛੋਕੜ 'ਤੇ ਸਵਾਲ ਚੁੱਕੇ ਹਨ। ਕਿਉਂਕਿ ਇੱਥੇ ਲੜਾਈ ਕੁਰਸੀ ਦੀ ਹੈ, ਲੜਾਈ ਕਾਂਗਰਸ ਪਾਰਟੀ ਦੀ ਸ਼ਕਤੀ ਤੋਂ ਬਾਹਰ ਹੋ ਜਾਂਦੀ ਹੈ, ਇਸ ਲਈ ਅਸ਼ੋਕ ਗਹਿਲੋਤ ਹਰ ਉਸ ਦਾਅਵੇ ਦੀ ਕੋਸ਼ਿਸ਼ ਕਰਨਾ ਚਾਹੁੰਦੇ ਹਨ ਜੋ ਸਚਿਨ ਪਾਇਲਟ ਦੇ ਅਕਸ ਨੂੰ ਢਾਹ ਲਾਉਂਦਾ ਹੈ।
ਐਸਓਜੀ ਨੋਟਿਸ ਨੇ ਵਧਾਇਆ ਸਚਿਨ ਦਾ ਪਾਰਾ
ਸਚਿਨ ਨੇ ਭਾਂਵੇ ਪਾਰਟੀ ਵਿਰੁੱਧ ਬਗਾਵਤ ਕੀਤੀ ਹੈ ਪਰ ਸੱਚਾਈ ਇਹ ਹੈ ਕਿ ਉਹ ਭਾਜਪਾ ਵਿੱਚ ਵੀ ਸ਼ਾਮਲ ਨਹੀਂ ਹੋ ਰਹੇ, ਇਸ ਲਈ ਅਸ਼ੋਕ ਗਹਿਲੋਤ ਲਈ ਮੁਸ਼ਕਲਾਂ ਵਧੀਆਂ ਹਨ। ਐਸਓਜੀ ਵੱਲੋਂ ਭੇਜੇ ਗਏ ਨੋਟਿਸ ਨੇ ਸਚਿਨ ਪਾਇਲਟ ਨੂੰ ਪਰੇਸ਼ਾਨ ਕੀਤਾ ਕਿਉਂਕਿ ਉਨ੍ਹਾਂ ਨੂੰ ਮਹਿਸੂਸ ਹੋਇਆ ਕਿ ਉਸ ਨੂੰ ਜਾਣ ਬੁੱਝ ਕੇ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ।
ਨੌਜਵਾਨ ਆਗੂਆਂ ਨੂੰ ਰਾਹੁਲ ਅਤੇ ਪ੍ਰਿਯੰਕਾ ਦੇ ਹੇਠਾਂ ਹੀ ਰਹਿਣਾ ਪਵੇਗਾ
ਰਾਸ਼ਟਰੀ ਮੁੱਦਿਆਂ 'ਤੇ ਆਪਣੇ ਵਿਚਾਰ ਖੁੱਲ੍ਹ ਕੇ ਜ਼ਾਹਰ ਕਰਨ ਵਾਲੇ ਅਭਿਰੰਜਨ ਕੁਮਾਰ ਦਾ ਕਹਿਣਾ ਹੈ ਕਿ ਇਹ ਮਾਮਲਾ ਕਾਂਗਰਸ ਦਾ ਘੱਟ ਅਤੇ ਗਾਂਧੀ ਪਰਿਵਾਰ ਦਾ ਜ਼ਿਆਦਾ ਹੈ, ਜੋ ਕਿਸੇ ਵੀ ਸਥਿਤੀ ਵਿੱਚ ਗ਼ੈਰ-ਕਾਂਗਰਸੀ ਆਗੂਆਂ ਨੂੰ ਇੱਕ ਹੱਦ ਤੋਂ ਅੱਗੇ ਵਧਦੇ ਨਹੀਂ ਦੇਖ ਸਕਦੇ। ਭਾਵੇਂ ਤੁਸੀਂ ਕਾਂਗਰਸ ਵਿੱਚ ਰਹਿੰਦੇ ਹੋਏ ਕਿੰਨੀ ਵੀ ਤਰੱਕੀ ਕਰਦੇ ਹੋ, ਤੁਹਾਨੂੰ ਰਾਹੁਲ ਗਾਂਧੀ ਅਤੇ ਪ੍ਰਿਯੰਕਾ ਗਾਂਧੀ ਦੇ ਹੇਠਾਂ ਹੀ ਰਹਿਣਾ ਪਵੇਗਾ।
ਕਾਂਗਰਸ ਗਾਂਧੀ ਪਰਿਵਾਰ ਦੇ ਹੱਥ ਵਿੱਚ ਹੀ ਹੈ। ਸਾਰਿਆਂ ਨੂੰ ਗਾਂਧੀ ਪਰਿਵਾਰ ਦੇ ਹੇਠਾਂ ਕੰਮ ਕਰਨਾ ਪਵੇਗਾ। ਇਹ ਰੁਝਾਨ 1929 ਤੋਂ ਚਲਦਾ ਆ ਰਿਹਾ ਹੈ, ਜਦੋਂ ਮੋਤੀ ਲਾਲ ਨਹਿਰੂ ਨੇ ਜਵਾਹਰ ਲਾਲ ਨਹਿਰੂ ਨੂੰ ਕਾਂਗਰਸ ਦਾ ਪ੍ਰਧਾਨ ਬਣਾਇਆ ਸੀ। ਰਾਜਵੰਸ਼ 90 ਸਾਲਾਂ ਤੋਂ ਚੱਲ ਰਿਹਾ ਹੈ। ਅਗਲੇ 20 ਸਾਲਾਂ ਲਈ ਕਾਂਗਰਸ ਨੇ ਆਪਣਾ ਏਜੰਡਾ ਤੈਅ ਕੀਤਾ ਹੋਇਆ ਹੈ, ਜਿਸ ਕਾਰਨ ਕਾਂਗਰਸ ਲਗਾਤਾਰ ਖ਼ਾਤਮੇ ਵੱਲ ਜਾ ਰਹੀ ਹੈ।
